यस्तो छ बक्स अफिस रिपोर्ट : रामायण र बाटुलो जुन रिलिजसँगे बाँकीको व्यापार कमजोर


ब्युटी न्युज नेपाल
काठमाडौँ, ३० कात्तिक

चलचित्र विकास बोर्डले बक्स अफिस रिपोर्ट अन्तरर्गत चलचित्र घरमा प्रदर्शन भईरहेको नेपाली चलचित्रहरुको २९ कात्तिक आइतबार रातीसम्मको ब्यापार परिणाम आज सार्वजनिक गरेको छ । सो रिपोर्टमा गत साता रिलिज भएको नेपाली चलचित्र ‘पाँच पाण्डव’ बक्स अफिसमा हदै कमजोर देखिएको छ । यस्तै दशैँमा रिलिज भएको नेपाली चलचित्र ‘कबड्डी ५’को ब्यापार पनि चौथो सातामा आईपुग्दा खस्किएको देखिन्छ ।

चलचित्र विकास बोर्डले आज सार्वजनिक गरेको बक्स अफिस रिपोर्ट होर्दा चलचित्र ‘पाँच पाण्डब’को व्यापार रिलिज भएको १० दिनको कमाइ ४५ लाख रुपैयाँ पनि पुग्न सकेको छैन । करिब ४ करोडमा बनेको भनिएको यो चलचित्र भारतीय सिनेमा रामायणको चेपुवामा परेको छ । जसका कारण पाँच पाण्डबले आइतबारसम्म १२ हजार २९४ वटा टिकट बिक्री गर्दै स्वदेशमा ४३ लाख ५० हजार ४८३ रुपैयाँको व्यापार गरेको छ । चलचित्र निर्माणको लागतको अनुपातमा यो ब्यापार निकै कमजोर हो । यो चलचित्रमा हरिबँश आचार्य, आर्यन सिग्देल, जितु नेपाल, इभा गिरी, दीपाश्री निरौला, महेश त्रिपाठी जस्ता कलाकार भएर पनि यसको व्यापार राम्रो हुन सकेन ।

यस्तै ६ कात्तिकमा रिलिज भएको नेपाली चलचित्र ‘कबड्डी ५’को व्यापार यो चौथ हप्तामा कमजोर देखिएको छ । पछिल्लो समय रिलिज भएको रामायण र बाटुलो जुनले यसको व्यापार प्रभावित पारेको हो । तथापि आईतबारसम्म यो चलचित्रले करिब १३ करोडको व्यापार गरेको छ । बक्स अफिस रिपोर्ट अनुसार आइतबार बेलुकासम्म कबड्डी ५ले १२ करोड ९४ लाख १५ हजार ४३७ रुपैयाँको ग्रस कमाएको छ । सोही अवधिसम्म फिल्मका ४ लाख २२ हजार ८८० वटा टिकट बिक्री भएका छन् । तथापि अहिलेसम्मको रिपोर्ट हेर्दा गौँथलीपछि कबड्डी ५ यो यस वर्ष सर्वाधिक कमाउने चलचित्रको सूचीमा दोस्रो स्थानमा रहेको छ ।

यतिबेला प्रदर्शन भईरहेका चलचित्रहरुमा ‘कबड्डी ५’पछि दोस्रो ठूलो व्यापार चलचित्र ‘पेन्सन पट्टा’ बनेको छ । यसले आइतबार (हिजो)सम्म १० करोड ३५ लाख ७८ हजार ४७८ रुपैयाँ ग्रस कमाइ गर्दै ३ लाख ६४ हजार ५२० वटा टिकट बिक्री गरेको छ । रोचक कुरा के छ भने ‘कबड्डी ५’ र ‘पेन्सन पट्टा’ दुवैमा दयाहाङ राई मुख्य भूमिकामा छन् । यस वर्ष कुनै अभिनेताको फिल्मले लगातार १० करोडमाथिको व्यापार गरेको यो पहिलो हो ।

दसैंमा प्रदर्शन भएका तीन फिल्ममा भने ‘आ बाट आमा २’ले सर्वाधिक कमाइ गरेको छ । यसले २ लाख ४१ हजार ९६ वटा टिकट बिक्री गर्दै ६ करोड ९१ लाख ३७ हजार ३१२ रुपैयाँ ग्रस कमाएको छ । दोस्रो स्थानमा ३ करोड ४३ लाख १७ हजार ४५ रुपैयाँ ग्रससहित ‘छ माया छपक्कै २’ छ भने तेस्रोमा २ करोड ३२ लाख ९६ हजार ३७१ रुपैयाँ ग्रससहित ‘१२ गाउँ २’ छ ।