ब्युटी न्युज नेपाल
काठमाडौँ, ६ असोज
अभिनेता पल शाह र अभिनेत्री जसिता गुरुङ पहिलोपटक पर्दामा जोडीका रूपमा देखिने भएका छन्। निर्माता रोहित अधिकारीले आफ्नो ब्यानर रोहित अधिकारी फिल्म्सबाट निर्माण गर्न लागेको नयाँ फिल्ममा पल र जसिताको जोडी तय भएको हो।
फिल्मका लागि जसितासँग सोमबार औपचारिक सम्झौता गरिएको निर्माण पक्षले जनाएको छ। पलसँग भने यसअघि नै मौखिक सहमति भइसकेको निर्माता अधिकारीले बताएका छन्। फिल्म निर्देशनका लागि निर्देशक दिपेन्द्र लामासँग पनि सोमबार नै सम्झौता गरिएको छ।
फिल्मको शीर्षक भने अहिलेसम्म तय गरिएको छैन। हाल निर्माण पक्षले कलाकार तथा प्राविधिक टोली छनोटको काम अघि बढाइरहेको छ। अन्य कलाकारलाई समेत क्रमशः अनुबन्ध गर्दै फिल्म छायांकनमा लैजाने तयारी भइरहेको जनाइएको छ।
निर्माता रोहित अधिकारीले यसअघि पनि विभिन्न चर्चित फिल्म निर्माण गरिसकेका छन्। नयाँ फिल्ममा पल र जसिताको जोडीलाई पहिलोपटक एकसाथ प्रस्तुत गर्न लागिएको हो। फिल्मको कथा, विषयवस्तु तथा अन्य प्राविधिक पक्षबारे भने निर्माण पक्षले विस्तृत जानकारी सार्वजनिक गरेको छैन।
निर्देशक लामाले यसअघि विभिन्न चलचित्रमार्फत आफ्नो छुट्टै पहिचान बनाइसकेका छन्। पल र जसिताको जोडीलाई लिएर बन्न लागेको नयाँ फिल्ममा उनको निर्देशन रहनेछ।
यसैबीच, रोहित अधिकारी फिल्म्सले अभिनेता अनमोल केसीलाई लिएर फिल्म ‘फर्की फर्की’को सिक्वेल निर्माण गर्ने तयारी पनि अघि बढाइसकेको छ। उक्त फिल्मका लागि अनमोलसँग सम्झौता भइसकेको निर्माण पक्षले जनाएको छ।
पल शाह–जसिता गुरुङ अभिनीत फिल्मको अन्य कलाकार, प्राविधिक टोली, शीर्षक तथा छायांकन मितिसम्बन्धी जानकारी भने निर्माण पक्षले क्रमशः सार्वजनिक गर्ने तयारी गरेको छ।
