ब्युटी न्युज नेपाल
काठमाडौँ, २८ भदौ
टंक बुढाथोकीको निर्देशनमा निर्माण भइरहेको चलचित्र ‘मन बिनाको धन–२’को काठमाडौं उपत्यकामा पहिलो चरणको छायांकन पूरा भएको छ। भदौ ४ गतेदेखि सुरु भएको छायांकन २४ दिनपछि पूरा भएको निर्माण पक्षले जनाएको छ।
भदौ ३ गते शुभमुहूर्त गरिएको चलचित्रको काठमाडौं चरणको काम सकिएसँगै निर्माण टोली अर्को चरणको छायांकनका लागि मुस्ताङ जाने तयारीमा जुटेको छ। केही दिनपछि मुस्ताङमा चलचित्रका महत्वपूर्ण दृश्य छायांकन गरिने जनाइएको छ।
टंक बुढाथोकी प्रोडक्सनको ब्यानरमा निर्माण भइरहेको चलचित्रमा नेपाली चलचित्र क्षेत्रका चर्चित कलाकारहरूको अभिनय रहेको छ। चलचित्रमा मदनकृष्ण श्रेष्ठ, सरोज खनाल, गौरी मल्ल, विपिन कार्की, पूजा शर्मा, महेश त्रिपाठी, ए.आर. बुढाथोकी, राजाराम पौडेल, किरण केसी, लक्ष्मी गिरी, प्रकाश घिमिरे, निर्मल शर्मा, रश्मिला तामाङ, प्रभातपाल ठकुरी र शंकर श्रेष्ठलगायत कलाकारको अभिनय छ। परिवार, सम्बन्ध र भावनात्मक पक्षलाई कथाको केन्द्रमा राखिएको चलचित्रको कथा निर्देशक बुढाथोकीले तयार पारेका हुन्। पटकथा तथा संवाद शिवम् अधिकारीको रहेको छ भने चलचित्रको संगीत पनि बुढाथोकीले नै सम्हाल्नेछन्।
विष्णुमाया मैनाली बुढाथोकी निर्माता रहेको चलचित्रको छायांकन नरेन्द्र मैनालीले गरेका छन्। मित्र डी. गुरुङ सम्पादन तथा रेनिश फागो कलरिङमा छन्। चलचित्रमा कविराज गहतराजको नृत्य निर्देशन र शुक्रराज शाहको द्वन्द्व निर्देशन रहेको छ। नवराज शर्मा मुख्य सहायक निर्देशक तथा भोला सुवेदी ‘प्रनाप’ प्रोडक्सन म्यानेजरका रूपमा कार्यरत छन्।
