ब्युटी न्युज नेपाल
काठमाडौं, १४ फागुन
महाशिवरात्रिको अवसर पारेर नयाँ चलचित्र ‘कोशेढुंगा’को शुभ मुहूर्त गरिएको छ । बुधवार बिहान ललितपुरको च्यासलमा यो चलचित्रको पूजाआजा सहित मुहूर्त गरिएको छ ।
यो वर्षको सर्वाधिक सफल चलचित्र ‘पूर्ण बहादुरको सारंगी’का निर्देशक सरोज पौडेलले निर्देशनमा यो चलचित्र निर्माण हुँदै छ ।
यो चलचित्रको मुहूर्त सटसँगै आजैबाट सुरु भएको यसका कार्यकारी निर्माता दिनेश खड्काले सञ्चारकर्मीलाई जानकारी गराए ।
मुहूर्तपछि पत्रकार भेटघाट कार्यक्रमको आयोजना गर्दै निर्माण पक्षले यो सामाजिक कथामा आधारित चलचित्र रहेको जानकारी गरायो । यो चलचित्रको काठमाडौँमा करिब एक हप्ता छायांकन गरेपछि निर्माण युनिट बाँकी छायांकनको लागि स्याङ्जा जाने यसका निर्देशक पौडेलले कार्यक्रममा जानकारी गराए ।
यो चलचित्रमा सुरक्षा पन्त, आर्यन सिक्देल, सरोज खनाल, विशाल पहाडी, शेखर चापागाईं, सिरु विष्ट, उद्वव सापकोटा, सन्ध्या राना, सविता रेग्मी, सविन कट्टेल, विकास खनाललगायत कलाकार छन् । अर्को चलचित्र महाभोजको छायांकनमा व्यस्त भएका कारण अभिनेता आर्यन भने मुहूर्तमा आउन सकेनन् । उनी शनिवारबाट यो चलचित्रको छायांकनमा जोडिने भएका छन् ।
यो चलचित्र ग्रामीण समाजको कथा र महिला प्रधान विषयवस्तुमा आधारित रहेका कारण आफू जोडिएको अभिनेत्री सुरक्षाले बत्ताइन् ।
नरदेवी फिल्मसको प्रस्तुति रहेको चलचित्रमा प्रेविल कँडेल र किशोर अनुराग निर्माताको रूपमा रहनेछन् । कार्यकारी निर्मातामा दिनेश खड्का रहनेछन् । बाबु श्रेष्ठको डीओपी रहने चलचित्रलाई सुरेन्द्र पौडेलले सम्पादन गर्नेछन् । चलचित्रमा संगीत रिदम कँडेल र आशिष् अविरलको रहनेछ भने कास्टिङ डिरेक्टरमा सुवलमणि सापकोटा रहनेछन् ।
निर्माण पक्षका अनुसार यो चलचित्र २०८२ मा रिलिज हुनेछ ।
