ब्युटी न्युज नेपाल
काठमाडौँ, ५ फागुन
नेपाली चलचित्र ‘मायावी’ फागुनको १४ गतेबाट रिलिजमा आउँदै छ । यो चलचित्रको ट्रेलरले यती बेला दर्शकको राम्रो प्रतिक्रिया पाई रहेको छ । ३ दिन अगाडि सार्वजनिक फिल्मको ट्रेलरले ११ लाख ४३ हजार भन्दा बढी भ्यूज पाइसकेको छ । साथै, अहिले यो युट्युबको सिनेमा सेक्सन अन्तरगतको २ नम्बर ट्रेन्डिङमा छ ।
दर्शकको उत्कृष्ट प्रतिक्रियासँगै ट्रेलरमा समावेश संवादहरूमा थुप्रै टिकटक बनेका छन् । टिकटकमा अहिले ‘मायावी’को विषयवस्तुलाई लिएर दर्शकको उत्साह खुबै देखिएको छ ।
दर्शकले फिल्मको संवाद र यसको कथावस्तु लोभलाग्दो रहेको भन्दै फिल्मको प्रतीक्षा गरिरहेको उल्लेख गरेका छन् ।
दिवाकर भट्टराईको लेखन तथा निर्देशनमा तयार भएको यो चलचित्रको ट्रेलरमा २४ हजार भन्दा बढी लाइक र ३ हजार ३ सय भन्दा बढी प्रतिक्रिया आएका छन् ।
यो फिल्ममा पल शाह, दिपिका प्रसाईँ, प्रशान्त ताम्राकार, सुशील सिटौला, करिष्मा श्रेष्ठको साथमा नव–नायक समिम खानको मुख्य भूमिका छ । अधिकांश दर्शकले यस्तो लभ स्टोरी कथा यस अगाडि नहेरेको भन्दै प्रतीक्षा गरिरहेको प्रतिक्रिया दिएका छन् ।
फिल्म ‘मायावी’का संवादहरूमा अहिले थुप्रै टिकटक बनेका छन् । दर्शकहरूले फिल्मको ट्रेलरलाई उत्कृष्ट प्रतिक्रिया दिएको भन्दै निर्देशक भट्टराईले खुशी व्यक्त गरे । यो फिल्मलाई राज कटुवाल, ध्रुव न्यौपाने र चन्द्र पन्तले मिलेर बनाएका हुन् ।
