ब्युटी न्युज नेपाल
काठमाडौं, ३० असोज
इभेन्ट बेटर ग्यालेक्सी इन्टरटेनमेन्ट प्रा.लि.ले २०८१ सालको बडा दशैंको अबसर पारेर ‘छैटौं हिमालयन चँगा चेट तथा मनसुन फेशन परेड पुल पार्टी’ आयोजना गरेको छ । काठमाडौंको तारकेश्वर नेचर भ्यु पार्कमा आयोजना गरिएको यो कार्यक्रममा सुरुमा विभिन्न कलाकार, मोडल, कोरियोग्राफर, इभेन्ट आयोजक, व्यबसायी तथा सामाजिक व्यक्तिहरुले चँगा उडाएर रमाईलो गरे । कार्यक्रममा चँगा चेट अन्तर्गत एकले अर्काको चँगा चेट गर्ने (काट्ने) निकै रमाईलो प्रतिस्पर्धा चलेको थियो ।
हिमालयन बियर पार्टीसँगै दिउँसोबाट सुरु भएको चँगा चेट अपरान्हसँग चलेको थियो । त्यसपछि मनसुन फेशन परेड सुरु भयो । रितेश रामपालको कोरियोग्राफीमा सम्पन्न फेशन शोमा चिनोले तयार पारेको विभिन्न ड्रेसमा सजिएर मोडलहरु र्याम्पमा उत्रिएका थिए । उनीहरुलाई रिहिना मेकअप स्टुडियोले सुन्दर र ग्लामर बनाएको थियो ।
मनसुन फेशन शोमा सन्दीप कार्कीले स्याक्सोफोनको पाश्र्व धुन प्रत्यक्ष प्रस्तुत गरेका थिए । सो धुनमा क्याटवाक गर्दै मोडलहरु र्याम्पमा उत्रिएका थिए । मोडलहरु रोशिका पौडेल, आयुश्मा आचार्य, प्रश्मा खतिवडा, अनिषा अधिकारी, अनिशा नगरकोटीलगायतले मनसुन फेशन शोमा क्याटवाक गरेका थिए । उनीहरु क्याजुअल समर ड्रेस तथा गाउनमा र्याम्पमा उत्रिएका थिए ।
फेशन शो पछि बेलुकासम्म डिजे तथा पुल डान्स पार्टी आयोजना गरिएको थियो । सुरुमा र्याम्पमा उत्रिएका मोडलहरु पछि डिजे पार्टीमा रमाएका थिए । कार्यक्रमलाई प्रतिक्षा डँगोलले सञ्चालन गरेकी थिईन् ।
बिगतमा मनसुन फेशन परेड साउन भदौमा आयोजना हुने भए पनि यसपटक आसोजसम्म मनसुन रहेकाले दशैंको अबसर पारेर मनसुन फेशन परेड र चँगा चेट कार्यक्रमसँगै आयोजना गरिएको इभेन्ट बेटर ग्यालेक्सीका अध्यक्ष धिरज तण्डुकारले ब्युटी न्युज नेपाललाई बताए ।
