ब्युटी न्युज नेपाल
काठमाडौँ, १५ असार
नायिका पूजा शर्माले आफूद्धारा निर्मित चलचित्र ‘रत्यौली’को १५ असारको अवसर पारेर पोष्टर सार्वजनिक गर्दै आगामी २१ फागुनलाई प्रदर्शन मिति तोकेकी छिन् । पोष्टरमा पुजा र बिजय बराल प्रस्तुत छन् । चलचित्रको छायांकन भने अझै सुरु भएको छैन । सोही कारण पनि यसको रिलिज मिति आगामी २१ फागुन तोकिएको हो ।
नाईटिङ्गेल ईन्टरटेन्मेन्ट प्रा.लि र पूजा शर्मा प्रोडक्सनको व्यानरमा निर्माण हुन लागेको यो फिल्मको छायांकन भदौ महिनाबाट सुरु हुँदैछ । यो फिल्मको वितरणको जिम्मा रिच इन्टरटेन्मेन्टका लागि करण श्रेष्ठले लिएका छन् ।
महाशिवरात्री र नारी दिवस परेकाले फिल्मको प्रदर्शन मिति फागुन २१ लाई तय गरिएको करणले बताएका छन् ।
सामाजिक कथावस्तुमा तयार हुने यो फिल्मको हाल धमाधम प्रि–प्रोडक्सनको काम चलिरहेको छ । सुरज आचार्यको निर्माणमा तयार हुने फिल्मलाई मुस्कान ढकालले निर्देशन गर्दैछन् । यो फिल्ममा नायक विजय बराल र नायिका पूजा शर्मा फाइनल भइसकेका छन् ।
