रिलिज चलचित्र
ब्युटी न्युज नेपाल
काठमाडौं, १८ जेठ
केही समयबाट हास्य चलचित्रको बाहुल्यता बढेको बेला शुक्रबारबाट मुलुकका सिनेमा हलमा चलचित्र कप्स (सत्य सेवा सुरक्षणम्) शुक्रबारबाट रिलिज भयो । आफ्नो चलचित्रले शनिबार मुलुकका धेरैजसो सिनेमाहलमा हाउसफुल व्यापार गरेको यसका निर्देशक सम्राट सापकोटाले जानकारी गराएका छन् ।
शनिबार बिहान र दिउँसोको शो हाउसफुल भएको र बेलुका वर्षाले केही असर पार्न खोजे पनि दर्शकहरु हलमा आएको पनि सापकोटाले बताए ।
यो चलचित्रको शुक्रबार बेलुका प्रेस प्रदर्शनी गरिएको थियो । सञ्चारकर्मीबाट फिल्मले राम्रो प्रतिक्रिया पायो । बुधबार ईदको बिदा परेकाले त्यो दिन पनि राम्रो व्यापार गर्ने विश्वास निर्देशक सापकोटाले व्यक्त गरेका छन् ।
यो चलचित्र अपहरणकारी, भ्रस्टाचारी, गुन्डागर्दी बिरुद्धको कथामा केन्द्रित रहेको निर्देशक सम्राट सापकोटाले बताए । आफ्नो चलचित्र ‘कप्स’ काठमाडौं उपत्यकाको २० र मोफसलका ५० सहित ७० वटा हलबाट रिलिज भएको पनि निर्देशक सापकोटाले जानकारी गराए ।
यो चलचित्रमा अनुप बिक्रम शाही, नव अभिनेत्री सन्दिपा लिम्बु, रामराज क्षत्री, अमित गिरी, सम्राट सापकोटा, अनुपमा भण्डारी, पुरन जोशी, रोशन सुवेदी, नन्दु श्रीवास्तब, सुन्दर श्रेष्ठ, बब्लु विक्रम थापालगायतका कलाकारको अभिनय छ ।
कप्समा सापकोटाको यो डेब्यु निर्देशन रहेको छ । तीन दशक लामो अभिनय अनुभवलाई समेटेर आफुले यो फिल्म निर्देशन गरेको सापकोटाले बताएका छन् । कप्समा अनुप बिक्रम शाही प्रहरी नायब उपरिक्षकको भूमिकामा रहेको छ । अनुप प्राय खल पात्रको भूमिकामा देखिँदै आएका थिए भने यस चलचित्रमा भने एक सच्चा प्रहरी अफिसरको रुपमा छन् ।
कप्समा सुसन प्रजापतिको छायाँकन, बिजय घिमिरेको संगीत, कविराज गहतराजको नृत्य, बिपिन मल्लको सम्पादन रहेको छ । फिल्म आर्या मुभिज र सारा श्री मुभिजको संयुक्त व्यानरमा निर्माण भएको हो । यो चलचित्रलाई राम शाक्यले निर्माण गरेका हुन् ।
