ब्युटी न्युज नेपाल
काठमाडौं ५ माघ
चलचित्रको प्रचारमा काठमाडौंबाट निक्लिएको गोपी टिम चितवनको एउटा गाई गोठमा पुग्दा ती गोठका सञ्चालक छक्क परेका छन् । १८ माघबाट रिलिज हुने यो फिल्मको युनिटले चितवनमा गाई व्यवसाय गर्ने गोपी ढकाललाई शनिबार भेटेका हुन् ।
यसरी बास्तविक गोपीलाई भेट्दा फिल्मका गोपी विपिन कार्की र गोपिनी वर्षा राउत पनि खुसी भए । चितवनको ठूलो गड्डीस्थित गोपी ढकालको ढकाल गाई गोठ भ्रमण गर्दै उनको व्यवसायका बारेमा बिपिन, वर्षा र गोपी टिमले भलाकुसारी गरे ।
गोपीका निर्देशक दीपेन्द्र लामाका अनुसार अभिनेता बिपिन कार्कीले ‘गोपी’को सुटिङको सुटिङ ताका नै यस्ता थुप्रै पात्र भेटेका छन् । जसले फिल्मको कथा मेरै जस्तो जस्तो लाग्यो भन्ने गरेका छन् । उनले ट्रेलर सार्वजनिक भएपछि त यस्तो प्रतिक्रिया दिने बाक्लै छन् । बिपिनले गोपीको ढकाल गाईफर्मको अवलोकन गर्दै फिल्मले उहाँहरु जस्ता कृषकलाई हौसला दिने बताए ।
‘तर, उहाँको त नाम मात्र हैन, गाई पाल्ने कथा पनि फिल्मको जस्तै रहेछ । संर्घष पनि फिल्मको जस्तै लाग्यो ,’ बिपिनले भने, ‘यो फिल्मको विशेषता नै यही हो की फिल्म हेरिसक्दा गाई पाल्नेले मात्र होइन जुनसुकै व्यवसाय गर्नेले पनि यसले आफ्नै कथा भनेको महसुस गर्नुहुन्छ ।’
२०५० सालदेखि चितवनमा गाई पालन गर्दै आएका गोपी ढकालले फिल्मको पोस्टर र ट्रेलरले आफ्नै कथा भनेको महसुस भएपछि फिल्मको टिमसँग भेट्न मन लागेको बताए ।
‘छोरा भाइले पहिला फिल्मको पोस्टर देखाए । आफ्नो नाम र गाई देखेपछि केहो भन्ने भयो । पछि ट्रेलर पनि देखेपछि त कसरी मेरै कथामा फिल्म बनाएछन् भन्ने लाग्यो र आज उहाँहरुसँग भेटेर उहाँहरुको कुरा सुनेपछि त झनै आफ्नै कथामा फिल्म बनेको रहेछ जस्तो लागेको छ,’ गोपीले भने, ‘मैले त आजसम्म हल टेकेको छैन । पहिलो चोटि आफ्नै नाम र कथामा बनेको फिल्म अब हेर्नेछु ।’
ढकालले आफ्नो फार्ममा सयभन्दा बढी गाई रहेको र दिनको ८ सय लिटर दुध उत्पादन गर्ने जानकारी पनि गराए ।
फिल्मको प्रचारका लागि चितवन आइपुगेको ‘गोपी’को टिममा बिपिन, वर्षासँगै लेखक सामीप्यराज तिमल्सेना र कार्यकारी निर्माता श्रीधर पौडेल थिए । शनिबार नै पत्रकारसँग अन्तक्र्रियासमेत गरेको टिमले फिल्मले देशमै केही सकिने सम्भावनालाई फिल्मले प्रस्तुतिको माध्यम बनाएको जानकारी गराएको थियो ।
अभिनेत्री वर्षा राउतले पनि स्वावलम्बन र स्वरोजगारको विषयलाई मुखरित गरेको फिल्मले मनोरञ्जनसँगै युवालाई देशमै केही गर्न प्रेरित गर्ने बताइन् । ‘ हाम्रो पहिलो उद्देश्य मनोरञ्जन दिनु नै हो । तर, यो फिल्मले आफ्नै विषय र शैलीमा यसलाई पस्कने जमर्को गरेको छ,‘उनले भनिन्, ‘फिल्मले नेपालमा केही गरिरहेकालाई त हौसला दिन्छ नै नगरेकालाई पनि केही गर्न आँट दिन्छ ।’
माघ १८ बाट प्रदर्शनमा आउने फिल्ममा बिपिन र वर्षाका अलावा सुरक्षा पन्त, प्रकाश घिमिरे, भोला सापकोटा, अंकित खड्का, हिउँवाला गौतम आदिको अभिनय रहेको छ । दीपेन्द्र लामाको कथा तथा निर्देशन रहेको फिल्मलाई सामीप्यराज तिमल्सेनाले लेखेका हुन् । आरोही केसीको निर्माण रहेको फिल्ममा श्रीधर पौडेल कार्यकारी निर्माता रहेका छन् ।
