ब्युटी न्युज नेपाल
काठमाडौँ, १६ कात्तिक
एक्सनप्रधान चलचित्र ‘एक्का तीन’मा अभिनेता सुशील श्रेष्ठ अनुबन्धित भएका छन्। मंसिरको पहिलो सातादेखि छायाङ्कनमा जाने तयारीमा रहेको यस चलचित्रमा सुशीलको प्रवेशसँगै अभिनेत्री पूजा शर्मा र कविता नेपाली पनि मुख्य भूमिकामा रहने भएका छन्।
चलचित्र निर्माण पक्ष र अभिनेता सुशीलबीच औपचारिक सम्झौता भइसकेको छ। हाल चलचित्र ‘साम्राज्य’को छायाङ्कनमा व्यस्त सुशीलले मंसिरको पहिलो सातादेखि ‘एक्का तीन’का लागि समय दिने जनाइएको छ।
नेपाली चलचित्र क्षेत्रमा एक्सन अभिनेताको परिचय बनाएका सुशीलसँगै पूजा र कविताको उपस्थिति रहने भएपछि चलचित्रमा एक्सन र मनोरञ्जनको संयोजन देख्न पाइने अपेक्षा गरिएको छ। दुवै अभिनेत्रीले पनि आफ्नो अभिनय तथा एक्सन प्रस्तुतिमार्फत दर्शकमाझ अलग पहिचान बनाइसकेका छन्।
रुपेश तामाङको निर्देशनमा निर्माण हुन लागेको चलचित्रको कथा सुमन गजमेरले लेखेका हुन्। जुना फिल्मस्को ब्यानरमा निर्माण हुने यस चलचित्रलाई मंसिरको पहिलो सातादेखि छायाङ्कनमा लैजाने तयारी गरिएको छ।
यद्यपि, चलचित्रमा सुशील श्रेष्ठको जोडीका रूपमा पूजा शर्मा र कविता नेपालीमध्ये को रहने भन्ने विषयमा निर्माण पक्षले औपचारिक जानकारी सार्वजनिक गरेको छैन। तीन कलाकारको मुख्य भूमिका रहने भएपछि उनीहरूको चरित्र र आपसी सम्बन्धलाई लिएर चलचित्रप्रति दर्शकको चासो बढ्ने देखिएको छ।
