ब्युटी न्युज नेपाल
काठमाडौँ, १४ वैशाख
हालै एसइई दिएर बसेका छात्र छात्राहरूका लागि बज्रयोगिनी डान्स एन्ड म्युजिक एकेडेमी कपनको आयोजनामा छैटौँ संस्करणको ‘एसइई डान्स च्याम्पियनसिप–२०२५’ को घोषणा गरिएको छ ।
शिक्षा र नृत्यलाई जोड्ने योजना अनुरूप यो च्याम्पियनसिप आयोजना गर्न लागिएको प्राज्ञ तथा बज्रयोगिनी डान्स एन्ड म्युजिक एकेडेमीका अध्यक्ष महेश गोदारले बताएका छन् ।
काठमाडौँमा पत्रकार भेटघाट आयोजना गर्दै ‘एसइई डान्स च्याम्पियनसिप–२०२५’ फारम खुलासँगै डिजिटल अडिसनको लागि आफूले गरेको डान्सको भिडियो समेत पठाउन आह्वान गरिएको छ । विगत पाँच वर्षदेखि यो च्याम्पियनसिप आयोजना हुँदै आएको छ । यस पटकको यो कार्यक्रमलाई आफूहरूले अझ भव्य बनाउने तयारी गरिएको पनि अध्यक्ष गोदारले पत्रकार भेटघाटका क्रममा जानकारी गराए ।
हरेक संस्करणमा उत्कृष्ट २० जनाका दरले पाँचौँ संस्करणसम्म यो प्रतियोगिताका १०० जना विद्यार्थीहरूले कक्षा ११ र १२ मा पूर्ण छात्रवृत्ति जितेर देशभरका प्रतिष्ठित कलेजहरूमा अध्ययन गर्ने अवसर यो प्रतियोगिताले दिएको पनि अध्यक्ष महेश गोदारले बताए ।
पत्रकार भेटघाट कार्यक्रममा अध्यक्ष महेश गोदारले भने,‘एसइई डान्स च्याम्पियनसिपमा यस पटक एसइई दिएर बसेका नेपाल भरका विद्यार्थीहरूले फारम भरेर अडिसन दिन पाउने छन् । हामीले यसरी प्राप्त भिडियोबाट डिजिटल अडिसन मार्फत सुरुमा सेमी फाइनल र त्यसपछि फाइनलका लागि उत्कृष्ट २० प्रतियोगी चयन गर्ने छौँ ।’
फाइनल पुगेका उत्कृष्ट २० जना प्रतियोगीले समेतले कक्षा ११ र कक्षा १२ मा अध्ययनका लागि पूर्ण छात्रवृत्ति पाउने पाउने पनि आयोजक पक्षले जानकारी गराएको छ । यसरी बिजेतादेखि उत्कृष्ट २० सम्म पर्ने सबैले प्रति व्यक्ति करिब दुई लाख रुपैयाँसम्मको पूर्ण छात्रवृत्ति पाउने छन् ।
‘विगतमा झैँ यस पटक पनि एसइई डान्स च्याम्पियनसिपका विजेताले एक लाख रुपैयाँ, दोस्रो हुनेले ५० हजार रुपैयाँ, तेस्रो हुनेले ३० हजार रुपैयाँ, ट्रफी र विभिन्न उपहार प्राप्त गर्ने छन् । यसरी च्याम्पियनसिपको प्रथम दोस्रो र तेस्रोले नगदसँगै ११ र १२ कक्षाको पूर्ण छात्रवृत्ति समेत पाउने छन्,’ अध्यक्ष गोदारले जानकारी गराए । उनका अनुसार यो च्याम्पियनसिपको फारम खुला भइसकेको छ । यो प्रतियोगिताको फाईकन आगामी ७ असारमा राष्ट्रिय नाचघर जमल, काठमाडौँको मेघा हलमा आयोजना हुने छ । यो च्याम्पियनसिपको निर्णायकहरूमा नृत्यज्ञहरू प्रेम श्रेष्ठ, नारायण रिजाल, रोहिया महर्जन, शान्ति कठायत र पटेल रहनेछन्।
यो प्रतियोगिताको लागि गण्डकी प्रदेशबाट प्रत्यक्ष अडिसन लिइने छ भने अन्य प्रदर्शनबाट प्रतियोगीले नृत्य गरेर पठाएको भिडियोको आधारमा डिजिटल अडिसन मार्फत सेमी फाइनल चयन गरिने पनि आयोजक पक्षले जनाएको छ । मनासलु वल्र्ड कलेज र नेपाल संगीत तथा नाट्य प्रज्ञा प्रतिष्ठानको सहकार्यमा यो प्रतियोगिता हुने आयोजक पक्षले जनाएको छ ।
