ब्युटी न्युज नेपाल
काठमाडौं, ३० असार
श्रम स्विकृति लिएर वैदेशिक रोजगारी गएका नेपालीले रोजगारीको क्रममा मृत्यु भएमा उनका परिवारले राज्यबाट १० लाख रुपैयाँ राहत पाउने भएका छन् । बैदेशिक रोजगारीका क्रममा यस अघि मृत्यु भएका नेपाली श्रमिकका परिवारले ७ लाख रुपैयाँ राहत पाउँदै आएका थिए । २०६४ सालमा बैदेशिक रोजगार बोर्ड स्थापना भएपछि त्यसको केही वर्षपछिदेखि सो बोर्ड मार्फत बिदेश जाने श्रमिकबाट जनही १ हजार रुपैयाँ लिने गरिन्थ्यो । सोही बोर्डमा जम्मा भएको रकमबाटबिदेशमा मृत्यु भएका नेपाली श्रमिकको शबलाई नेपाल ल्याउन आर्थिक सहयोग गरिन्थ्यो ।
सोही कोषबाट केही वर्ष यतादेखि बैदेशिक रोजगारीमा ज्यान गुमाएका नेपाली कामदारका परिवारलाई नेपाल सरकारले आर्थिक सहयोग सहयोग सुरु गरेको थियो । यस अघि प्रति मृतकको परिवारले पाउँदै आएको ७ लाख रुपैयाँमा यतिबेला बृद्धि गरेर १० लाख पुर्याईएको हो । यही १८ असोजको मन्त्रिपरिषदको बैठकले वैदेशिक रोजगार नियमावली संशोधन पारित गर्दै बैदेशिक रोजगारीमा मृत्यु भएका नेपाली श्रमिकको परिवारले पाउने आर्थिक सहायता रकममा वृद्धिको निर्णय गरेको हो ।
हाल सरकारले मृतकको दुई जना सन्तानका लागि वार्षिक ८ हजार छात्रवृत्ति दिँदै आएको छ । यो रकम पनि निकै कम भएकाले मृतकका सन्तानलाई दिदै आएको छात्रवृत्ति पनि बढाउनु पर्ने बैदेशिक रोजगारीमा ज्यान गुमाएका श्रमिकका परिवारको माग रहेको छ ।
वैदेशिक रोजगार बोर्डको तथ्याँक अनुसार नेपालबाट वार्षिक साढे सात लाख श्रमिकहरु वैदेशिक रोजगारीमा जाने गरेका छन् । २०६५ सालबाट हालसम्म बैदेशिक रोजगारीमा गएका १३ हजार भन्दा बढी नेपाली श्रमिकले ज्यान गुमाईसकेका छन् ।
पछिल्लो तीन आर्थिक वर्षमात्र बैदेशिक रोजगारीमा रहेका ३ हजार ८ सय श्रमिकको ज्यान गएको छ । बोर्डको तथ्यांक अनुसार आर्थिक वर्ष ०७८/०७९ मा १ हजार ४७९ ज्यान गुमाए भने ०७९/०८० मा १ हजार ३० ज्यान गुमाए । यस्तै आर्थिक वर्ष ०८०/०८१ मा भने १ हजार ३४६ जनाले ज्यान गुमाएका छन् ।
