ब्युटी न्युज नेपाल
काठमाडौं, २८ साउन
आगामी २४ असोज फुलपातिको दिन रिलिज हुने छक्का पञ्जाको सफल सिक्वेल अन्तर्गत ‘छक्का पञ्जा ५’को पहिलो गीत यतिबेला सार्वजनिक भएको छ । यो गीत ओएसआर डिजिटलबाट सार्वजनिक भएको हो । दीपक शर्माको संगीत रहेको गीत ‘बिहे भाको छैन…’ निकै रमाईलो छ । गीतले दर्शकको व्यापक रमाईलो प्रतिक्रिया पाएको छ ।
यस अघि देखन चम्पा, पहिलो नम्बरमा, दर्शन सलाम जस्ता सर्वाधिक लोकप्रिय गीत सृजना गरेर छक्का पञ्जा सृँखलालाई सुपरहिट बनाउँदै आएका दीपक शर्माको यसपटकको यो गीत पनि त्यत्तिकै लोकप्रिय छ । सुरुका स्थानीय गीतको विहे भाकै छैन, म कुमारी पनि हैन…मा केही दर्शकको प्रतिक्रिया आए पनि धेरैले यसलाई रुचाएका छन् । गीतको सृजना दिपक शर्मासँगै दीपकराज गिरीले गरेका हुन् । जसमा सविन सुवेदी र बेनिशा पौडेलको माधुर्य स्वर रहेको छ । गीतलाई रिकेश गुरुङले संगीत संयोजन गरेका हुन् ।
यो गीतको भिडियो पनि त्यत्तिकै रमाईलो बनेको छ । भिडियोमा चलचित्र छक्का पञ्जा ५ का दुई मुख्य कलाकार दीपक राज गिरी र वर्षा सिवाकोटीको प्रेम सम्बन्धलाई प्रस्तुत गरिएको छ । गीतको भिडियोमा सुनिल क्षेत्रीको कोरियोग्राफी रहेको छ ।
पहिलो देखि तेश्रो सृँखलासम्म निर्देशन गरेकी दीपाश्री निरौलाले नै यो पाचौं सृँखला पनि निर्देशन गरेकी हुन् ।छक्का पञ्जा ५ मा दीपक राज गिरी, वर्षा शिवाकोटी, केदार घिमिरे (माग्ने बुढा), आर्यन सिग्देल, तेज गिरी, मेक्सम गौडेलसहित विभिन्न कलाकारको अभिनय रहेको छ ।
सिनेमालाई श्री ब्यंकटेश इन्टरटेनमेन्ट र माता पाथिभार फिल्मस्ले वितरण गर्दैछन् । अभिनेता निर्माता दीपक राज गिरीको पटकथा रहेको छक्का पञ्जा ५ को कथा र संवाद दीपक, केदार र दीलिप तामाङले मिलेर लेखेका हुन् । हरि हुँमागाईको डिओपी, उत्तम हुँमागाईको छायांकन, रोशन श्रेष्ठको द्धन्द्व निर्देशन, कपिल पराजुलीको कलर रहेको सिनेमामा विपिन मल्लको सम्पादन छ ।
