ब्युटी न्युज नेपाल
काठमाडौं, २८ असार
आज विहान ३ः३० बजे चितवनको नारायणगढ–मुग्लिन सडकखण्डको सिमलताल भन्ने ठाउँमा पहिरोले पुरिएको गणपति डिलक्सको बसमा चालक र सहचालकसहित ३१ यात्रु रहेको सो बसका टिकट बुकिङ इञ्चार्ज दीपु कुमारले बताएका छन् । काठमाडौंबाट गौरका लागि छुटेको गणपति डिलक्स र वीरगञ्जबाट काठमाडौंतर्फ गइरहेको एन्जल डिलक्सका दुईवटा बसलाई आज बिहान करिब साढे तीन बजे चितवनको भरतपुर महानगरपालिका–२९ सिमताल भन्ने स्थानमा लेदो माटोसहितको पहिरोले पुरेको थियो ।
उनका अनुसार काठमाडौंको नयाँबसपार्कबाट गौर प्रस्थान गरेको ०००१ ख २४९५ नम्बरको बसमा चालक, सहचालक र २७ यात्रु गरी जम्मा २९ जना र थप दुई जना बीच बाटोबाट चढेर ३१ जना बसमा थिए । दीपकका अनुसार बसलाई किशोर कुमार चौधरीले चलाएका थिए ।
सो बसमा यात्रा गरेका यात्रुहरुमा नन्दन दास, राज पटेल, प्रिन्स जैशवाल, ओकिल खान, नन्दु, अमिता, हरिचन्द्र, शम्भु, नवीन, ओम, राजकिशोर, शैलेन्द्र लगायत रहेको दीपकले काटेको रसिदमा उल्लेख छ । बाँकी अरु यात्रीमा नन्दुको ५ जना, शन्भु र नवीनको नामबाट ४ रहेका छन् ।
यसैगरी जोरपाटी काउन्टरबाट सोझै ५ जना चढेको उल्लेख छ । ती ५ जनाको नाम उल्लेख गरिएको छैन । यी मध्य यो वसबाट तीन जना यात्रुले हाम फालेर आफ्नो ज्यान जोगाए । बाँकी २८ जना यात्रु र सिँगो बसको अझै अत्तोपत्तो छैन । सैनिक, शसस्त्र प्रहरी, नेपाल प्रहरी र स्थानीयले हराएकाहरुको खोजी गरिरहेका छन् ।
यसैगरी बीरगञ्जबाट काठमाडौं आउँदै गर्दा पहिरोमा पुरिएको एन्जल डिलक्स बसमा वीरगञ्चबाट चालकसहित २४ जना यात्रु चढेको सो बसको टिकट काउन्टरले पुष्टी गरेको छ । प्रदेश ०३००६ ख १५१६ नं. को सो बसमा बीच बाटोमा यात्रु चढेका वा नचढेको भन्नेबारे आफुहरुलाई कुनै खबर नआएको पनि सो बसको बुकिङ काउन्टरले जनाएको छ । सो बसलाई चालक जवाहिर महतोले चलाएका थिए । बसमा केही भारतीय यात्रीहरु पनि थिए ।
