ब्युटी न्युज नेपाल
काठमाडौं, १३ जेठ
आफ्ना २३ जना प्रतिस्पर्धीलाई पछि पार्दै ‘मिस नेपाल वल्र्ड २०२३’ को ताज काठमाडौंकी २३ वर्षिया श्रीच्छा प्रधानले चुमेकी छिन् । ललितपुरको गोदावरीस्थित सनराइज सभा हलमा शनिबार सम्पन्न अन्तिम प्रतिस्पर्धामा उत्रिएका २४ प्रतिस्पर्धीमध्यबाट मिस नेपाल वल्र्डको उपाधी प्रधानले प्राप्त गरेकी हुन् । उनलाई गत वर्षकी मिस नेपाल प्रियंकरानी जोशीले मिस नेपाल वल्र्डको ताज पहिराइन्।
नयाँ मिस नेपाल वल्र्ड प्रधान वातावरण विज्ञानमा स्नातक छिन् । उनी वातावरण अभियान्तको रुपमा यो क्षेत्रमा स्थापित हुन चाहन्छिन् । ग्रान्ड फिनाले समारोहमा श्रीच्छाले अर्को उपाधि फेस अफ द इयर पनि हाँसिल गरिन् । श्रीच्छा यस वर्ष नयाँ मिस नेपाल भएपनि मिस नेपाल प्रियंकरानी जोशीले नै सन् २०२२ को आगामी मिस वल्र्ड प्रतियोगितामा नेपालबाट भागलिने छिन् ।
सोही प्रतिस्पर्धामा मिस नेपाल इन्टरनेशनलको उपाधि प्रसिद्धि शाहले जितिन् । उनले मिस पपुलर च्वाइसको उपाधि पनि हाँसिल गरिन् । अब उनी मिस इन्टरनेशनलमा नेपालबाट प्रस्तुत हुनेछिन् । यसैगरी मिस नेपाल अर्थको उपाधि रायना मजगैयाँले जितकी छन्। रायनाले मिस हेल्दी स्किनको उपाधि पनि प्राप्त गरिन् ।
ग्रान्ड फिनाले समारोहमा अन्य विभिन्न विधामा पनि प्रतिस्पर्धा भएको थियो । जस मध्य ऐश्वर्या श्रेष्ठ मिस फिटनेस क्वीन र मिस इन्टलेक्चुअल, ग्रिष्मा अधिकारी मिस ग्ल्यामर घोषित भए । यस्तै मिस कन्फिडेन्ट प्रज्ञा बज्राचार्य, मिस मल्टिमिडिया सुहानी खड्का क्षत्री, वुमन विद विंग्स उन्नती गुरुङ, मिस फोटोजेनिक कीर्तिका खड्का, मिस ब्यूटी विथ द पर्पस आयुष्मा बराल बन्न सफल भए ।
ग्रान्ड फिनाले समारोहमा नेपाली फेसन, चलचित्र र संगीत क्षेत्रका प्रतिष्ठित व्यक्तित्वहरुको उपस्थिति रहेको थियो। कार्यक्रममा नेपाली रक स्टार अभय सुब्बाको एकल प्रस्तुति सहित अन्य मनोरञ्जनात्मक कार्यक्रमहरु प्रस्तुत गरिएको थियो ।
