ब्युटी न्युज नेपाल
काठमाडौं, १० माघ
१३ को उमेरमा निर्मम वलात्कारपछि हत्या भएकी बालिका निर्मला पन्तको घटनालाई चलचित्रमा उतारेर चलचित्र कोपिला निर्माण गरिएको छ ।
सुदुरपश्चिम प्रदेशको कन्चनपुरकी बलात्कारपछि हत्या भएकी निर्मलाको हत्यारा अझै पत्ता लगाउन प्रहरीले सकेको छैन । यही घटनामा आधारित रहेर बनाईएको चलचित्र ‘कोपिला’को शुक्रबार हेटौंडाको एन एस सिनेमा हलमा विशेष प्रदर्शन गरिएको छ ।
यो चलचित्रको च्यारिटी शोमा दिवँगत निर्मलाकी आमा दुर्गादेवी पन्त पनि सहभागी भईन् । उनी कन्चनपुरबाट शुक्रबार बिहानमात्र कोपिलाको विशेष प्रदर्शनमा आईपुगेकी हुन् ।
चलचित्र हेर्ने क्रममा आमा दुर्गादेवीले आँशु रोक्न सकिनन् । चलचित्रको कार्यक्रममा उनी पीडा र कमजोरीका कारण बेहोस पनि भईन् ।
मकवानपुर जागरण अभियानले आयोजना गरेको विशेष प्रदर्शन (च्यारेटी शो) स्वर्गीय निर्मला पन्तको आमा दुर्गादेवी पन्तलाई आभार पत्र सहित नगद ५० हजार प्रदान गरियोे । पन्तलाई चलचित्रका निर्देशक शिबम् अधिकारी, निर्माता मणिराज गौतम, गणेश गिरी, सुबासराज काफ्ले, जागरण अभियानका अध्यक्ष कृष्णराज कोईरालाले संयुक्त रुपमा रकम प्रदान गरे ।
विशेष प्रदर्शनीमा निर्मलाकी आमा दुर्गादेवी पन्त सहित चलचित्रका कलाकार टोली, सञ्चारकर्मी र विभिन्न व्यक्तिहरु अतिथिका रुपमा सहभागी भए । कोपिलाका कलाकारहरु गणेश गिरी, सरिता गिरी, संजीवनी खरेल, प्रकृती खरेल, जुनिफर पौडेल, श्रेया आचार्य कार्यक्रममा सहभागी थिए । यस्तै अभिनेता रमित ढुगाना, चलचित्र निर्माता कृषा चौलागाई, पत्रकार निर्देशक डब्बु क्षेत्री, निर्देशक गोबिन्द गौतम सहित विभिन्न संचारकर्मी सहभागी थिए ।
दिवँगत निर्मलाकी आमा दुर्गादेबीले कार्यक्रममा बोल्दै आफुले छोरी गुमाए पनि चलचित्र कोपिलाले नेपाली चेलीलाई सचेत बनाउनु र बलात्कार हुनबाट जोगिन सघाउने विश्वास व्यक्त गरिन् । आफुले न्याय पाउन नसकेको बेला यो फिल्मले न्यायको मागमा दवाव दिन सघाउने विश्वास पनि उनले कार्यक्रममा व्यक्त गरिन् ।
अभिनेत्री सरिता गिरीले चलचित्र कोपिलामा निर्मलाकी आमाको भूमिका निर्वाहगर्न निकै गाह्रो भएको बताईन् । नारीमाथि हुने हरेक प्रकारको हिँसा अन्त्यको लागि यो एउटा अभियान भएको भनाई उनले कार्यक्रममा राखिन् ।
नेपाल पत्रकार महासंघ कन्चनपुरका अध्यक्ष बिष्णु अबस्थीले यस्तो सिनेमा समाजका लागि अपरिहार्य भएको बताए । निर्मला पन्तको कथालाई उठान गरेर चलचित्र बनाएकोमा उनले आभार ब्यक्त गर्दै यो चलचित्रले आम निर्मलाहरुको प्रतिनिधत्व गर्ने भनाई अध्यक्ष अबस्थीले कार्यक्रममा राखे ।
यस्तै कन्चनपुरबाटै आएकी महिला अधिकारकर्मी प्रेमपति रानाले पनि चलचित्रबाट आम समाजलाई सुसुचित गराउने बताईन् । चलचित्र कोपिलाले आम नेपाली छोरीचेलीहरुलाई यस्ता घटनाबाट सजग बनाउने विश्वास व्यक्त गरिन् ।
निर्देशक शिवम अधिकारीले निर्मालाले न्याय पाउन नसकेको बेला न्यायको लागि आबाज उठाउन र सरकारलाई दवाव दिन चलचित्र कोपिला बनाएको बताए ।
यो चलचित्रमा सरिता गिरी, गणेश गिरी, संजिवनी खरेल, प्रकृति खरेल, जुनिफर पौडेल, श्रेया आचार्य, ऋद्धिचरण श्रेष्ठ, अस्मिता सुनार (जुरेली) प्रणव सुवेदी, बिमल पौडेलसहित विभिन्न कलाकारहरुको अभिनय रहेको छ । जसमा निर्मलाको भूमिकामा संजिवनी खरेल छिन् । उनको अभिनयको दर्शकले खुलेर प्रसँसा गरे । विशेष प्रदर्शनीमा हेटौंडाबासीले चलचित्र कोपिला सत्य घटनामा केन्द्रित भएर निकै राम्रो बनेको बताए ।
