ब्युटी न्युज नेपाल
काठमाडौँ, २२ असोज
संगीतकार तथा गायक सूर्य राईको संगीतमा नयाँ गीत ‘निष्ठुरी’ सार्वजनिक भएको छ। लोकप्रिय गायक प्रमोद खरेलको स्वरमा रहेको गीतले प्रेम, विछोड र प्रियजनको सम्झनामा छटपटाइरहेको मनको भावलाई प्रस्तुत गरेको छ।
प्रेम सम्बन्धमा आएको दूरी र त्यसपछि सिर्जना हुने एक्लोपन तथा पीडालाई गीतका शब्दमार्फत भावनात्मक रूपमा अभिव्यक्त गरिएको छ। आफूले माया गरेको व्यक्ति टाढिँदा मनमा उत्पन्न हुने सम्झना, विरह र छटपटीलाई गीतले समेटेको छ। प्रमोद खरेलको भावपूर्ण स्वरले गीतको भावनालाई अझ प्रभावकारी बनाएको छ।
गीतको भिडियोमा बरुण अधिकारी र बिना राउतले अभिनय गरेका छन्। प्रेमकथामा आधारित भिडियोमा उनीहरूले प्रेमदेखि विछोडसम्मका विभिन्न भावनात्मक अवस्थालाई अभिनयमार्फत प्रस्तुत गरेका छन्। भिडियोमा प्रेममा रहेका दुई पात्रको सम्बन्ध, त्यसमा आउने उतारचढाव र बिछोडपछिको पीडालाई कथात्मक शैलीमा देखाइएको छ।
‘निष्ठुरी’का शब्द बरुण अधिकारीले लेखेका हुन् भने संगीत सूर्य राईको रहेको छ। गीतको संगीत संयोजन विशन मानन्धरले गरेका छन्।
प्रेममा चोट पाएका तथा विछोडको पीडा भोगिरहेका श्रोता–दर्शकले गीतसँग आफूलाई जोड्न सक्ने निर्माण पक्षको विश्वास छ। ‘निष्ठुरी’ गीत एबी फिल्मीको आधिकारिक युट्युब च्यानलमार्फत सार्वजनिक गरिएको हो।
भिडियोको निर्देशनसमेत बरुण अधिकारीले नै गरेका छन्। संकल्प भुजेलले छायांकन गरेको भिडियोको सम्पादन विकास दाहालले गरेका हुन्। भिडियोमा गीतको भावअनुसार प्रेम र विछोडका दृश्यलाई प्रस्तुत गरिएको छ।
