ब्युटी न्युज नेपाल
काठमाडौं, १७ भदौ
भोटेकोशी–त्रिशूली बाढी आएको सातौँ दिनसम्म पनि खोज तथा उद्धार कार्य जारी छ। नेपाल प्रहरीका अनुसार बुधबार बिहानसम्म बाढी प्रभावित विभिन्न स्थानबाट १ हजार १ सय २७ जनाको शव फेला परेको छ। अझै ४ हजार ८ सय ५८ जना सम्पर्कविहीन छन्।
प्रहरीका अनुसार फेला परेका शवमध्ये सबैभन्दा धेरै चितवनबाट ३ सय ४८ वटा छन्। नवलपरासी पूर्वबाट २ सय १७, नवलपरासी पश्चिमबाट १ सय ९०, नुवाकोटबाट १ सय ५५, गोरखाबाट ६६, धादिङबाट ५९, रसुवाबाट ४५ र तनहुँबाट ३८ वटा शव फेला परेका छन्। भारतमा समेत ९ वटा शव फेला परेको प्रहरीले जनाएको छ।
फेला परेका शवमध्ये १ हजार १ सय १३ वटाको लासजाँच मुचुल्का सम्पन्न भएको छ भने ९५ वटा शव आफन्तलाई बुझाइएको छ। पहिचान हुन नसकेका ९ सय ११ शवको विवरण नेपाल प्रहरीले आफ्नो वेबसाइटमा सार्वजनिक गरेको जनाएको छ।
बाढी प्रभावित क्षेत्रबाट हालसम्म ६ हजार ५ सय ४१ जनाको जीवितै उद्धार गरिएको प्रहरीले जनाएको छ। उद्धार, खोजी, राहत वितरण तथा शव व्यवस्थापनका लागि ७ हजार ९ सय १२ जना प्रहरी कर्मचारी परिचालन गरिएको छ।
बेपत्ताको खोजीका साथै जोखिममा रहेका परिवारलाई सुरक्षित स्थानमा सार्ने, अवरुद्ध सडक तथा बाटो खुलाउने र स्थानीयवासी तथा अन्य सुरक्षा निकायसँगको समन्वयमा उद्धार कार्यलाई निरन्तरता दिइएको प्रहरीले जनाएको छ।
