ब्युटी न्युज नेपाल
काठमाडौँ, २२ साउन
नेपाली चलचित्रको इतिहास बोकेको पहिलो नेपाली चलचित्र ‘आमा’का चार कलाकार दशकौँपछि एकै ठाउँमा भेला भएका छन् । चलचित्र विकास बोर्डले आयोजना गरेको पुराना नेपाली चलचित्रको महोत्सव ‘ओल्ड इज गोल्ड’को पहिलो दिन ‘आमा’का कलाकार भुवन चन्द, चैत्यदेवी सिंह, वसुन्धरा भुसाल र विमला श्रेष्ठको विशेष उपस्थितिले कार्यक्रमलाई स्मरणीय बनाएको हो ।
पुराना तथा ऐतिहासिक नेपाली चलचित्रलाई पुनः ठूलो पर्दामा प्रदर्शन गर्दै नयाँ पुस्तालाई नेपाली सिनेमाको इतिहाससँग जोड्ने उद्देश्यले बोर्डले शुक्रबारदेखि ‘ओल्ड इज गोल्ड’ सुरु गरेको हो । पहिलो दिन प्रदर्शन गरिएको ‘आमा’ हेर्न दर्शकको उल्लेख्य उपस्थिति रहेको थियो । हलका सबै सिट भरिएपछि केही दर्शकले उभिएरै चलचित्र हेरेका थिए ।
कार्यक्रमको सुरुवातमा हास्यकलाकार हरिवंश आचार्य र चलचित्र विकास बोर्डका पूर्वअध्यक्ष कृष्ण मल्लले ‘आमा’का चारै कलाकारलाई माला लगाएर स्वागत गरेका थिए । त्यसपछि भुवन चन्द, चैत्यदेवी सिंह, वसुन्धरा भुसाल र विमला श्रेष्ठले संयुक्त रूपमा दीप प्रज्वलन गरी महोत्सवको उद्घाटन गरे ।
चलचित्र प्रदर्शनअघि बोर्ड अध्यक्ष दिनेश डीसीले चारै कलाकारसँग ‘आमा’ निर्माण हुँदाको समय, चलचित्रमा काम गर्दाका अनुभव तथा नेपाली चलचित्रको प्रारम्भिक यात्राबारे संवाद गरेका थिए । कलाकारहरूले त्यतिबेलाको चलचित्र निर्माणको अवस्था, सीमित प्रविधि, काम गर्ने शैली र ‘आमा’सँग जोडिएका आफ्ना अविस्मरणीय अनुभव दर्शकमाझ सुनाएका थिए ।
दशकौँअघि आफूहरूले अभिनय गरेको चलचित्र पुनः ठूलो पर्दामा हेर्न कलाकारहरू स्वयं उपस्थित हुँदा कार्यक्रम भावुक बनेको थियो । साथै, नयाँ पुस्तासहित विभिन्न उमेर समूहका दर्शकको उत्साहपूर्ण सहभागिताले पुराना नेपाली चलचित्रप्रतिको चासो अझै कायम रहेको देखाएको छ ।
बोर्ड अध्यक्ष डीसीले ‘ओल्ड इज गोल्ड’लाई नियमित कार्यक्रमका रूपमा अघि बढाउने घोषणा गरेका छन् । उनका अनुसार हरेक महिना एउटा ऐतिहासिक नेपाली चलचित्र प्रदर्शन गरिनेछ र त्यसबाट प्राप्त रकम चलचित्रकर्मी कल्याणकारी कोषमा जम्मा गरिनेछ ।
पुराना चलचित्रको संरक्षण, प्रवर्द्धन र नयाँ पुस्तासम्म नेपाली सिनेमाको इतिहास पुर्याउने तथा ती चलचित्रमा योगदान दिएका कलाकार र प्राविधिकको सम्मान गर्ने उद्देश्यले कार्यक्रमलाई निरन्तरता दिइने बोर्डले जनाएको छ ।
