ब्युटी न्युज नेपाल
काठमाडौं, २१ माघ
शुक्रबारबाट मुलुकका ८ दर्जन सिनेमा हलमा रिलिज भएको एक्सन प्रधान लभ स्टोरी चलचित्र रणवीरलाई दर्शकसँग कलाकारले पनि त्यत्तिकै मन पराएका छन् ।
सफल सृँखलाबद्ध चलचित्र छक्का पञ्जाकी निर्देशक, कलाकार दीपाश्री निरौलाले आईतबार दिउँसो चलचित्र रणवीर हेरेपछि यसले आफ्नो मन जितेको बताईन् । फिल्ममा एक्सन उत्कृष्ट भएको र निकै स्तरीय फिल्म रणवीर बनेको उनले बताईन् । दीपाश्रीसँगै यो चलचित्र हेरेका कलाकारहरु किरण केसी , शिवहरि पौडेल , दीपाश्री निरौला , मिलन चाम्स , सन्ध्या केसी , गौरव पहाडी लगायतले पनि रणवीर निकै राम्रो चलचित्र बनेको बताए ।
यो चलचित्रलाई प्रिमियर शोमा हेरेका अग्रज कलाकार सुनिल थापाले पनि रणवीर बलिउडको स्तरको चलचित्र बनेको बताए । चलचित्र क्याप्टेनको ट्रेलर रिलिज समारोहमा उनले रणवीरको बारे यस्तो बोलको हुन्,‘फिल्म निकै राम्रो बनेको छ , यो बलिउडको ए ग्रेडको फिल्म झैँ लाग्छ’ उनले भने ‘फिल्म हेर्नुस र फिल्मको बारेमा बोल्नुस , यस्ता फिल्मले हाम्रो स्तर बढाउछ ।’ उनले पछिल्लो समय बलिउडको स्पोर्ट्स ड्रामा ‘मेरिकोम’ मा काम गरेका थिए ।
फिल्ममा सुशील सिटौला, प्रशान्त ताम्राकार, शुभेच्क्षा खड्का, सुपुष्पा भट्ट, टिका पहाडी, नरेश पौडेल, रवी गिरी, भोलाराज सापकोटा, हरिहर शर्मा, जीवन भट्टराई, शैलेश्वरी सिंह, जगदीश रिजाल, बसन्ती भट्टलगायतको अभिनय रहेको छ ।
दीपेन्द्र रेग्मी र गोमा बिष्ट थापाले निर्माण गरेको यो चलचित्रलाई गोविन्द सिंह भण्डारीले लेखन निर्देशन गरेका हुन् । मुलुकका करिब आठ दर्जन सिनेमा हलमा रणवीरले दर्शकको मन जितिरहेको छ ।
