ब्युटी न्युज नेपाल
काठमाडौँ, २३ असोज
नेपाली मेकअप आर्टिस्ट तथा सौन्दर्य व्यवसायी लेमी तामाङले विश्व फेसन जगत्को प्रतिष्ठित मञ्च पेरिस फेसन विकमा ब्याकस्टेज मेकअप आर्टिस्टका रूपमा काम गर्दै अन्तर्राष्ट्रिय क्षेत्रमा आफ्नो पहिचान विस्तार गरिरहेकी छन्। १३ वर्षभन्दा लामो अनुभव हासिल गरेकी लेमीको यो उपलब्धिले नेपाली सौन्दर्य क्षेत्रको प्रतिभालाई अन्तर्राष्ट्रिय मञ्चमा प्रस्तुत गरेको छ।
नेपालबाट सुरु भएको उनको व्यावसायिक यात्रा अहिले पेरिससम्म पुगेको हो। सानैदेखि कला र मेकअपमा रुचि राख्ने उनले फाइन आर्ट्सको पृष्ठभूमिसहित नेपालमै आफ्नो करियर सुरु गरेकी थिइन्। त्यसपछि भारतको मुम्बई पुगेर सौन्दर्य तथा फेसन क्षेत्रमा काम गरेकी उनले दुबई, मिलान र न्यूयोर्कमा समेत व्यावसायिक अनुभव हासिल गरिन्।
यी सहरमा रहँदा उनले फेसन शो, सम्पादकीय फोटोसुट, व्यावसायिक परियोजना, प्रोडक्सन तथा विभिन्न सौन्दर्य अभियानमा काम गर्ने अवसर पाइन्। लामो समयको अनुभव र निरन्तर मेहनतपछि पेरिस फेसन विकमा काम गर्ने उनको सपना साकार भएको हो। यहाँ उनले अन्तर्राष्ट्रिय फेसन उद्योगका सिर्जनात्मक टोली, मोडल, डिजाइनर तथा उत्पादन समूहसँग सहकार्य गरिरहेकी छन्।
मेकअप आर्टिस्टका रूपमा अन्तर्राष्ट्रिय पहिचान बनाउनुका साथै लेमीले सौन्दर्य व्यवसायलाई पनि विस्तार गरेकी छन्। उनले सन् २०२१ मा ‘पेस्टल ब्युटी’ नामक नेपाली सौन्दर्य ब्रान्ड स्थापना गरेकी थिइन्। नेपाली बजारमा गुणस्तरीय मेकअप सामग्री सहज रूपमा उपलब्ध गराउने उद्देश्यले सुरु गरिएको यस ब्रान्डमा अनुहारको रङसँग सम्बन्धित सामग्री, विभिन्न मेकअप उत्पादन तथा व्यावसायिक मेकअप ब्रस समावेश छन्।
ब्रान्डका उत्पादन दक्षिण कोरियामा निर्माण हुँदै आएका छन्। उत्पादनको दायरा विस्तार गर्दै थप सामग्री विकास गर्ने कामसमेत भइरहेको जनाइएको छ।
यसैगरी, लेमीले सन् २०२५ मा ‘बिसु ब्युटी’ नामक अर्को सौन्दर्य ब्रान्ड पनि सार्वजनिक गरिन्। युवा पुस्तालाई लक्षित गरिएको यस ब्रान्डले किफायती मूल्यमा लिपस्टिकलगायत मेकअप सामग्री उपलब्ध गराउने उद्देश्य राखेको छ। यसमार्फत आत्मअभिव्यक्ति, सिर्जनशीलता र आधुनिक सौन्दर्य शैलीलाई प्राथमिकता दिइएको छ।
नेपालबाट सुरु भएको यात्रा मुम्बई, दुबई, मिलान र न्यूयोर्क हुँदै पेरिस फेसन विकको ब्याकस्टेजसम्म पुग्नु लेमीको व्यावसायिक जीवनको महत्वपूर्ण उपलब्धि हो। अन्तर्राष्ट्रिय फेसन क्षेत्रमा काम गर्नुका साथै आफ्नै दुई सौन्दर्य ब्रान्ड स्थापना गरेर उनले मेकअप कला र उद्यमशीलतालाई सँगसँगै अघि बढाएकी छन्।
लेमीको यो यात्रा निरन्तर मेहनत, सीप र लगनशीलताले अन्तर्राष्ट्रिय अवसरको ढोका खोल्न सक्छ भन्ने उदाहरण बनेको छ। पेरिस फेसन विकमा उनको सहभागिताले नेपाली सौन्दर्यकर्मीका लागि विश्व बजारमा आफ्नो क्षमता प्रस्तुत गर्ने सम्भावनालाई समेत उजागर गरेको छ।
