ब्युटी न्युज नेपाल
काठमाडौँ, २१ असोज
अभिनेता विराज भट्टको निर्देशन तथा निर्माणमा तयार भएको चलचित्र ‘१२ गाउँ २’ प्रदर्शनको संघारमा पुगेसँगै यसका प्रचार सामग्रीले दर्शकको ध्यान खिचिरहेको छ। एक्सनप्रधान टिजरबाट चर्चा कमाएको चलचित्रले पछिल्ला गीतमार्फत आफ्नो कथाको प्रेमिल तथा भावनात्मक पक्षसमेत सार्वजनिक गर्दै लगेको छ।
चलचित्रको प्रचार अभियानअन्तर्गत सार्वजनिक गरिएको ‘जुनेली’ पहिलो गीत हो। सुगम पोखरेलको स्वर रहेको गीतमा समीर भट्ट र कृशु शाहीलाई प्रेमिल अवतारमा प्रस्तुत गरिएको छ। गीतमा उनीहरूको जोडीसँगै समीरको नृत्य तथा ब्रेकडान्सले पनि दर्शकको ध्यान खिचेको थियो।
त्यसपछि सार्वजनिक ‘लालीगुराँस’ले चलचित्रमा रहेको प्रेमकथालाई थप उजागर गर्यो। एक्सन, द्वन्द्व र बदलाको कथामा केन्द्रित टिजर सार्वजनिक भएपछि चलचित्रमा एक्सनकै प्रधानता रहने अनुमान भइरहेका बेला ‘लालीगुराँस’ले समीर र कृशुको प्रेमिल सम्बन्धलाई अगाडि ल्याएको थियो।
यही क्रममा बुधबार सार्वजनिक गरिएको ‘रेशमी रुमाल’ले भने विराज भट्ट र वर्षा इटानीको जोडीलाई केन्द्रमा राखेको छ। गीतको भिडियोमार्फत उनीहरूबीचको सम्बन्ध र प्रेमलाई प्रस्तुत गरिएको छ। यसले ‘१२ गाउँ २’ केवल एक्सन र द्वन्द्वमा सीमित चलचित्र नभएको संकेत गरेको छ।
निर्माण पक्षले चलचित्रका गीतमार्फत फरक–फरक जोडी र कथाका भावनात्मक पाटालाई दर्शकमाझ पुर्याउने प्रयास गरेको देखिन्छ। ‘जुनेली’ले समीर–कृशुको जोडीलाई चिनाएको थियो भने ‘लालीगुराँस’ले उनीहरूको प्रेमलाई थप प्रस्ट्याएको थियो। अब ‘रेशमी रुमाल’मार्फत विराज र वर्षाको जोडीलाई दर्शकमाझ प्रस्तुत गरिएको छ।
‘१२ गाउँ २’को मुख्य आकर्षण भने एक्सन र द्वन्द्व नै हो। टिजरमा देखाइएको एक्सन, बदलाको कथा र द्वन्द्वले चलचित्रप्रति दर्शकको उत्सुकता बढाएको छ। तर गीतहरू सार्वजनिक हुँदै जाँदा चलचित्रमा एक्सनसँगै प्रेम, भावना तथा पारिवारिक सम्बन्धका पक्षसमेत समेटिएको देखिएको छ।
चलचित्रमा विराज भट्ट, समीर भट्ट, कृशु शाही र वर्षा इटानीसँगै अनुपविक्रम शाही, प्रकाश शाह, सुनील पोखरेल, कालु राना, खुसी कार्की, पुष्कर भट्ट, राज हमाल, प्रजल दुलाल, कमल देवकोटा, साहित सिंह ठकुरी, अर्जुन आचार्य, शिवा सिंह, नेहा आर शाह, पूर्णबहादुर गन्धर्व र सुदीर श्रेष्ठलगायतका कलाकारको अभिनय छ। यसै चलचित्रमार्फत कृशु शाही (काफिया) र वर्षा इटानीले नेपाली रजतपटमा डेब्यु गर्दैछन्।
दशैंको अवसर पारेर असोज ३० गते प्रदर्शनमा आउन लागेको ‘१२ गाउँ २’ले एक्सन, प्रेम र नयाँ पुस्ताका कलाकारको संयोजनमार्फत दर्शकलाई आकर्षित गर्ने लक्ष्य राखेको छ। विराज भट्टको निर्देशन तथा निर्माणसमेत रहेकाले चलचित्रप्रति सुरुदेखि नै दर्शकको चासो देखिएको छ।
चलचित्रमा युग भुसाल र डीपी खनालको संगीत, बन्दे प्रसादको सम्पादन, रामजी लामिछाने र सियोन श्रेष्ठको नृत्य निर्देशन तथा स्टन्ट सिल्भा र शंकर महर्जनको द्वन्द्व निर्देशन रहेको छ। चलचित्रको वितरण काफिया फिल्म्स र कुबेर सिनेमाले गर्नेछन्।
