ब्युटी न्युज नेपाल
काठमाडौँ, १६ असोज
सातदेखि १३ वर्ष उमेर समूहका बालबालिकाको प्रतिभा खोजीमा आधारित रियालिटी शो ‘नेशन्स गट ट्यालेन्ट सिजन–३’को मेगा अडिसन चरणमा १८० बालप्रतिभा प्रवेश गरेका छन् । विभिन्न स्थानीय तहमा गरिएको अडिसनबाट छनोट भएका उनीहरूले अब मेगा अडिसनमा आफ्नो प्रतिभा प्रस्तुत गर्दै टेलिभिजन राउन्डका लागि स्थान बनाउने प्रतिस्पर्धा गरिरहेका छन् ।
एएनपी मिडिया हाउसको आयोजनामा सञ्चालन भइरहेको शोका लागि गत वैशाखदेखि विभिन्न स्थानीय तहमा अडिसन गरिएको थियो । ती अडिसनमा करिब चार सय बालबालिकाले सहभागिता जनाएका थिए । स्थानीय चरण पार गर्दै १८० जना मेगा अडिसनका लागि छनोट भएका हुन् ।
‘नेशन्स गट ट्यालेन्ट सिजन–३ किड्स डान्स’को मेगा अडिसन बिहीबारदेखि ओएसआर रियालिटी युट्युब च्यानलमार्फत सार्वजनिक हुन थालेको छ । एपीवान स्टुडियोमा छायांकन गरिएको मेगा अडिसनमा निर्देशक तथा कोरियोग्राफर केशव राज भट्ट, कलाकार तथा मोडल राज टाइगर र मोडल कविता न्यौपाने निर्णायकका रूपमा रहेका छन् ।
मेगा अडिसनपछि प्रतिस्पर्धीको संख्या थप घटाइनेछ । आयोजकका अनुसार १८० जनामध्ये ८० जना मात्र टेलिभिजन राउन्डमा प्रवेश गर्नेछन् । एएनपी मिडिया हाउसका प्रबन्ध निर्देशक लबबहादुर कार्कीका अनुसार निर्णायकको छनोटबाट ६० जना र दर्शकको भोटिङबाट २० जना गरी ८० बालप्रतिभा छनोट गरिनेछन् ।
यससँगै स्थानीय तहबाट सुरु भएको प्रतिभा खोजी अब निर्णायकको मूल्यांकन र दर्शकको मतमार्फत अघि बढ्नेछ । टेलिभिजन राउन्डमा पुग्न बालप्रतिभाले आफ्नो नृत्य क्षमता प्रस्तुतिसँगै दर्शकको समर्थनसमेत हासिल गर्नुपर्नेछ ।
प्रनीमा दाहालले सञ्चालन गरिरहेको शोमा शम्भु प्रसाद रेग्मी संयोजक, अनीता तामाङ प्रशासन प्रमुख तथा लोमशबहादुर कार्की र लबिसकुमार कार्की इभेन्ट म्यानेजरका रूपमा रहेका छन् । स्थानीय तहदेखि सुरु भएको ‘नेशन्स गट ट्यालेन्ट–३’ अब मेगा अडिसन पार गर्दै मुख्य टेलिभिजन प्रतिस्पर्धातर्फ अघि बढेको छ ।
