ब्युटी न्युज नेपाल
काठमाडौं, ७ कात्तिक
तस्बिर : बद्री थापा , ब्युटी न्युज नेपाल
नेपाली चलचित्र ‘तेल भिसा’ आगामी ७ मँसिरमा रिलिज हुने भएको छ । यसैबीच यो चलचित्रको तेस्रो गीत कति रमाइलो…को भिडियो काठमाडौंमा एक समारोहबीच मंगलबार बेलुका सार्वजनिक गरिएको छ । यो गीतमा अञ्जु पन्त र आशिष अविरलको गायन, गायक अविरलकै संगीत र एक नारायण भण्डारीको शब्द छ ।
यो गीतको भिडियो पनि त्यत्तिकै रमाईलो छ । अभिनेत्री वर्षा राउतले आमाको भूमिका निर्वाह गरेको यो चलचित्रमा उनको ‘वेवी सावर’ कार्यक्रममा गरिएको रमाईलो नाचगानलाई यो गीतको भिडियोमा समेटिएको छ । ‘हरि नाम झैँ…’ र ‘तुकुनको मुकुन…’सहित दुई गीत सार्वजनिक गरिएका थियो भने मंगलबार सार्वजनिक गरिएको यो गीतको छायाँकन सँयुक्त राज्य अमेरिकामा गरिएको हो ।
शिशिर खातीको कोरियोग्राफीमा तयार भएको गीतको भिडियोमा अमेरिकामा रहँदै आएका कलाकारहरु दीलिप रायमाझी, सुशील क्षेत्री, अरुणिमा लम्साल, उषा पौडेल, विमलेश अधिकारी, अनुराग कुँवर प्रस्तुत छन् । उनीहरुसँगै सिनेमाका मुख्य कलाकारहरु वर्षासहित विपिन कार्की, पूजा चन्द र ऋचा घिमिरेलाई पनि भिडियोमा समेटिएका छन् ।
सिनेमामा बुद्धि तामाङ, सुचित्रा उप्रेती, अमेरिकी कलाकारहरु फ्रान्सिस शेरमन, ज्याक बेल लगायतको पनि अभिनय छ । यो सिनेमामा विपिनले बुबा र छोराको गरी दोहोरो भूमिका निभाएका छन् । उनी यतिवेला उनको स्वीटर सिनेमाको छायांकनको लागि पाँचथरमा रहेकाले यो सिनेमाको गीत रिलिज कार्यक्रममा उपस्थित थिएनन् ।
सिनेमाको गीत रिलिज कार्यक्रममा ऋचाले १० वर्षपछि नेपाली सिनेमा काम गर्दा एकदमै उर्जा महसुस भएको अनुभव सुनाइन् । उनी भन्छिन्, ‘सिनेमा नखेल्दा वा नबनाउँदा अक्सिजनको कमी हुने वा बाँच्नका लागि दिन कम हुने त होइन । तर, आफूलाई मन परेको काम गर्दा एकदमै उर्जा आउने रहेछ । १० वर्षपछि सिनेमा गर्दा त्यो महसुस गरेकी छु । यस्तो लाग्यो मेरो झुकाव र लगाव सिनेमाप्रति नै रहेछ ।’
‘तेल भिसा’को छायांकन पश्चात नाटक खेल्न अमेरिका पुगेकी अभिनेत्री वर्षा राउत पनि सिनेमाको गीत रिलिज कार्यक्रममा उपस्थित थिइन् । उनी अमेरिकामा मञ्चन भैरहेको नाटकको कामलाई केही समयलाई स्थगित गर्दै यो सिनेमाको प्रचार र दशैं तिहार मनाउन नेपाल फर्केकी हुन् । भाइटीकाको भोली पल्टै उनी नाटक खेल्न फेरी अमेरिका उड्ने तयारीमा छिन् । यो हप्ता उनी यो सिनेमाको प्रचारमा व्यस्त हुने तालिका रहेको गीत रिलिज कार्यक्रममा जानकारी दिइन् ।
वेलडन क्रियसनको ब्यानरमा निर्माण भएको सिनेमाकी प्रस्तुतकर्ता ऋचा घिमिरे हुन् । सिनेमाको निर्मातामा अनिल पाण्डे र शिवराज कार्की छन् भने प्रिन्स युवराज कार्की र श्रुती दाहाल कार्यकारी निर्माता हुन् । सिनेमामा सुशन प्रजापतिको छायांकन छ । सिनेमाको ट्रेलर आगामी आइतबार गर्ने तयारी निर्माण टिमको छ ।
