ब्युटी न्युज नेपाल
काठमाडौं, २३ असोज
चलचित्र ‘एक्टरः टेक वन’ को तिहारको अबसर पारेर १५ कात्तिकबाट रिलिज हुँदैछ । यही चलचित्रको यतिबेला पहिलो गीत ‘दिन बित्ला’ सार्वजनिक भएको छ । यो रोमाञ्चक गीतमा सनिश श्रेष्ठ र प्रीति कौरको स्वर छ । राजेश कुमार श्रेष्ठले लेखेको यो गीतमा एलिश कार्कीले संगीत सृजना गरेका हुन् । शैलेन्द्र प्रधान (बाबु)ले एरेन्ज गरेका गीतले प्रेममा रहेका दुई व्यक्तिको सम्बन्धलाई समयको यात्रासँग जोडेर प्रस्तुत गरेको छ, जसले उनीहरूको जीवनभरको साथको भावना व्यक्त गर्छ ।
शिशिर खातीले कोरियोग्राफी गरेको गीतको भिडियोमा अभिनेता प्रदिप खड्का र नव–अभिनेत्री दिव्या रायमाझी आकर्षक शैलीमा देखिएका छन् ।
चलचित्रलाई राजन भुसालले निर्देशन गरेका छन् र स्क्रिप्ट आकाश बराल र राजन भुसालको रहेको छ। प्रदिप खड्का, आना शर्मा, दिव्या रायमाझी, र राजबल्लभ कोइरालासहित दिव्य देव, उषा रजक, र सुशील सिटौलालगायतका कलाकारहरूको प्रमुख भूमिका रहेको यो चलचित्र अदृत फिल्मस् र मोती फिल्मस्को संयुक्त प्रस्तुति हो। निर्माता थमन कुमार भण्डारी, सह–निर्माता अनीश भुसाल र क्रियटिभ प्रोड्युसर मोती कार्की हुन्।
नरेन्द्र मैनालीको छायांकन रहेको यो चलचित्रलाई निमेष श्रेष्ठले सम्पादन गरेका छन्। हर्कुलस बस्नेत, रोहित शाक्य, र एलिस कार्कीले सङ्गीत दिएका छन्, र शिशिर खाती तथा किरण थापाले कोरियोग्री, द्वन्द्व निर्देशन अष्ट महर्जनले र कला निर्देशन कृष्णमान तामाङले गरेका छन् ।
