ब्युटी न्युज नेपाल
काठमाडौं, ५ असोज
चलचित्र खुस्मा शनिबार मुलुकका अधिकाँस सिनेमा हलमा हाउसफुल भएको यसका निर्माता एवम् निर्देशक अशोक कुमार थापाले बताएका छन् । बिहीबारबाट यो चलचित्र प्रदर्शनमा आएको हो । बिहीबारका विहानी शोबाट नै हाउसफूल सुरुवात गरेको सिनेमाको दिउँसोबाट हलमा दर्शकको चाप उच्च देखिएको थियो । शुक्रबार सिनेमाको व्यापार बिहीबारको तुलनामा केही कमजोर देखिए पनि पुनः राम्रो व्यापार गरेको थियो। शनिबार बिहानी शोमा ५० प्रतिशत आसपासमा अकुपेन्सी देखिए पनि दिउँसो १२ बजेपछिका शो धेरै ठाउँमा हाउसफुल भएको वितरक गोविन्द शाहीले जनाएका छन् ।
वितरक गोविन्द शाहीले सिनेमाले काठमाडौं उपत्यकाको तुलनामा मोफसलमा बम्पर व्यापार गरेको बताए । यसअघिका सिनेमामा मोफसलको व्यापार काठमाडौं उपत्यकाको भन्दा कमजोर देखिन्थो । तर, ‘खुस्मा’को हकमा भने ठिक विपरित देखिएको वितरक शाहीको भनाई छ । विभिन्न हलमा अनलाइन टिकट बुकिङ साइट हेर्दा पनि वितरक शाहीको दाबी पुष्टी हुन्थ्यो ।
सिनेमाले मोफलका पोखरा, नारायणगढ, बुटवल, नेपालगञ्ज, बिराटनगर, धरान, इटहरी, दमक र विर्तामोड लगायतका शहरमा विहानी हाउसफूल व्यापार गरेको थियो । काठमाडौं उपत्यकामा भने दिउँसो १२ बजेपछिका शोमा दर्शकको चाप देखिएको भनाई वितरक शाही थियो । काठमाडौं उपत्यकाका हलमा दर्शकको चाप देखिएपछि सिनेमाका मुख्य कलाकारहरु विभिन्न हलमा पुगेर दर्शकसँग साक्षात्कार गरेका थिए ।
सिनेमाको निर्मातामा विर बहादुर लामा, चन्द्र बहादुर भट्टचन, मान बहादुर धनाह मगर र बेतान मगर छन्, भने सह–निर्माता सुस्मिता बुढाथोकी हुन् । सिनेमामा दिपक बज्राचार्यको छायांकन रहेको छ । सिनेमाका यसअघि सार्वजनिक गीत र टिजरलाई दर्शकले रुचाएका छन् ।
सिनेमामा धिरज र उपासनाका अलवा माओत्से गुरुङ, खड्क बहादुर पुन (खबपु), सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगर, अरुन मगर, राजु रेग्मी मगर, सारा राई, श्वेता मिश्र, विवेश मगर लगायतका कलाकारको अभिनय रहेको छ ।
