ब्युटी न्युज नेपाल
काठमाडौं, २६ साउन
यतिबेला नेपालमा पाँचौ हप्तामा प्रदर्शन भईरहेको चलचित्र घरज्वाईं जापानमा पनि प्रदर्शन हुँदैछ । योच चलचित्र आइतबार राजधानी टोकियोमा प्रदर्शन हुन लागेको हो । घरज्वाइँको प्रदर्शनमा सहभागी हुन अभिनेत्री मिरुना मगर जापान तर्फ लागेकी छिन् ।
नेपाल मगर संघ जापानको आयोजनामा घरज्वाइँ जापानभर प्रदर्शन हुनेछ । अगस्ट ११ तारिखमा टोकियो, १४ तारिखमा नागोया र ओसाका सहरमा एकै चोटी सिनेमाको शो हुनेछ । सिजुओका, फुकुओका, क्योटो, हिरोसिमा, ओकिनावा लगायतका सहरमा पनि ‘घरज्वाइँ’ प्रदर्शन हुनेछ ।
करीब दुई लाख नेपाली रहेको जापानमा मिरुना मगरलाई पनि चाहिन्छ भन्ने नेपाली दर्शकहरुको मागलाई सम्बोधन सोरुप उनलाई निमन्त्रणा गरिएको संघका अध्यक्ष रामहरी खपाङ्गी मगरले बताए । जापानका लागी नेपाली राजदुत दुर्गा बहादुर सुवेदीको सपरिवार उपस्थित हुने शोमा एनआरएनए लगायत विभिन्न संघसंस्थाको उपस्थिति रहने जानकारी नेपाल मगर संघ जापानले दिएको छ ।
अनिल बुढा मगरको निर्देशन र जनक घर्ति मगरको निर्माण रहेको सिनेमामा दयाहाङ राई र मिरुना मगरको मुख्य रहेको छ । गत असार २८ गतेबाट नेपालमा प्रदर्शन भैरहेको सिनेमा आज शुक्रबारबाट ५ औं हप्तामा प्रवेश गरेको छ । नेपाल बाहेक विभिन्न देशहरुमा पनि सिनेमा चलिरहेको छ । रुकुम पुर्वको तकसेरा, बाच्चिगाउँ र लुगुम गाउँमा छयांकन गरिएको सिनेमाले त्यहाँको मगर समुदायमा प्रचलित घरज्वाइँ प्रथालाई उठान गरेको छ ।
