ब्युटी न्युज नेपाल
काठमाडौं, २३ असार
चलचित्र घरज्वाइँको दोस्रो गीत ’यानीमाया…’को भिडियो सार्वजनिक भएको छ । यो गीतको भिडियो शनिबार युट्युबमा सार्वजनिक भएको हो ।
गीतमा सिनेमाका मुख्य कलाकार दयाहाङ राई र मिरुना मगरले अभिनय गरेका छन् । उनीहरुको दैनिक सँघर्षको दृष्य भिडियोमा समेटिएको छ ।
सार्वजनिक गीतमा हर्क साउदको शब्द रचना तथा मनोज थापा मगरको संगीत तथा स्वर रहेको छ । यही गीतको रिदममा सिनेमाको ब्याग्राउण्ड म्युजिक तयार गरिएको निर्देशकले केहीदिन अगाडी आयोजित सिनेमाको ट्रेलर रिलिज कार्यक्रममा बताएका थिए ।
अनिल बुढा मगरको डेव्यु निर्देशनमा निर्माण भएको यो चलचित्र जिएम मूभीज र एबीएम सिनेमा प्रोडक्सनको ब्यानरमा तयार भएको छ । यो चलचित्रलाई सुसन प्रजापतिले खिचेका हुन् । पूर्वी रुकुम आसपासमा छायांकन गरिएको सिनेमाको कथा निर्देशक अनिल आफैले लेखेका हुन् । पटकथा तथा संवाद लेखनमा भने उनलाई बिनोद खतिवडा र सुभाष कोइरालाले सघाएका छन् ।
सिनेमालाई जनक घर्ती मगरले निर्माण गरेका हुन् । सिनेमामा दयाहाङ राई, मिरुना मगर, बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरको अभिनय छ । सिनेमा असार २८ गतेबाट नेपाल र विदेशमा एकसाथ रिलिज हुनेछ ।
कृष्ण भन्डारीले सम्पादन गर्ने सिनेमाको डिजिटल पार्टनर बुढा सुब्बा डिजिटल हो । एमएसएमले अष्ट्रेलियाले सिनेमाको विदेश प्रदर्शन अधिकार लिएको छ । नेपालमा सिनेमालाई आरआर फिल्मसले वितरण गर्दैछ ।
