ब्युटी न्युज नेपाल
काठमाडौं, १२ फागुन
चलचित्र ‘डिग्री माइला : एमए थर्ड क्लास’ आगामी नयाँ वर्षमा रिलिज हुने भएको छ । रामबाबु गुरुङ निर्देशित यो चलचित्रको पहिलो गीत ‘सुस्त सुस्त…’को भिडियो शुक्रबार सार्वजनिक गरिएको छ ।
गीतमा एसडी योगीको संगीत तथा दिल्लु चम्लागाईको शब्द रचना अनि संगीतकार योगी र बिज्ञानी पराजुलीको स्वर रहेको छ ।
यो गीतको भिडियोमा चलचित्रका मुख्य कलाकार दयाहाङ राई र आँचल शर्मालाई प्रेमालाप र रसरँगभाव प्रस्तुत गरिएको छ । गीतकोभिडियोमा युमी बलामीको कोरियोग्राफी र निर्देशक रेनेशा वान्तवा राईको डिओसी रहेको छ ।
बाँसुरी फिल्मस्को ब्यानरमा निर्माण भएको यो सिनेमाले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा पेसगर्छ । यही नाममाथि अभिनेता दयाको निर्देशनमा केही वर्षअगाडि नाटकसमेत प्रदर्शन भइसकेको छ । सिनेमा सोही नामको नाटकमा आधारित रहेको छ ।
बाँसुरी फिल्मस्ले कबड्डी फिल्म तथा सुस्मा फिल्मसँग मिलेर सिनेमाको निर्माण गरेको हो । सिनेमामा दयाहाङ र आँचलका अलवा विजय बराल, माओत्से गुरुङ, बुद्धि तामाङ, प्रकाश घिमिरेलगायतको अभिनय गर्नेछ । सिनेमाले ‘किन चाउरिस मरिच आफ्नै रागले‘ भन्ने चर्चित नेपाली उखानलाई आफ्नो ट्यागलाइन बनाएको छ ।
सिनेमा आगामी नेपाली नयाँ वर्षमा रिलिज हुनेछ । सिनेमामा नेमिश श्रेष्ठको सम्पादन तथा रोहित शाक्यको ब्याकग्राउण्ड म्यूजिक रहेको छ । यस्तै सिनेमालाई दुई क्यामराम्यान शिवराम श्रेष्ठ तथा राइली एस शिनले खिचेका छन् ।
