ब्युटी न्युज नेपाल
काठमाडौं, १८ माघ
रेखा थापाको चलचित्र ‘उपहार’ फागुन २५ गतेबाट देशव्यापी प्रदर्शनमा आउने भएको छ । यसै क्रममा यो चलचित्रको शीर्ष गीत हेरेको छैन…को भिडियो बिहीबार सार्वजनिक भएको छ । यो गीतमा रविन भुसालको स्वर, अर्जुन पोखरेलको संगीत र प्रमोद ढुंगानाको शब्द रहेको छ । गीतको भिडियोलाई ओएसआर डिजिटलबाट रिलिज गरिएको हो । यो गीतले फिल्मको कथाको सार भनेको छ । कविराज गहतराजले यो गीतको भिडियोलाई कोरियोग्राफी गरेका हुन् ।
गीतमा अभिनेत्री रेखा थापा, बेनिशा हमाल, पूजा शर्मा, मुकुन भुसाल, सुष्मा कार्कीले अभिनय गरेका छन् । ज्ञानेन्द्र देउजाको निर्देशनमा निर्माण भएको फिल्ममा मुकुन भुषाल, तेज गिरी, समर्पणजंग कार्की, सुष्मा कार्की, अंशु महर्जन, आशा भुुषाललगायतको पनि अभिनय छ । अभिनेत्री थापाका श्रीमान् बलराम शाही ठकुरी कार्यकारी निर्माता रहेको फिल्मका निर्माता सुलभ प्रतिक र समीक्षा देउजा हुन् ।
उपहार सामाजिक विषयवस्तुमा आधारित रहेकाले फिल्ममा हाँस्यरसदेखि रोदनसम्म सबै कुराको समिश्रण रहेको निर्देशक देउजा बताउँछन् । रेखा फिल्मस् र कपनगढी फिल्मस्को ब्यानरमा निर्माण भएको फिल्ममा विष्णु कल्पित घिमिरेको छायांकन, मित्र डि गुरुङको सम्पादन, सुलक्षण भारतीको कथा, भारतीका साथै अभिमन्यू निरवी र माधव शर्माको पटकथा तथा संवाद, अनुपम गौतमको भीएफएक्स र रोशन श्रेष्ठको द्वन्द्व निर्देशन छ ।
