ब्युटी न्युज नेपाल
काठमाडौं, २४ कात्तिक
निश्चल बस्नेतको चलचित्र ‘दिमाग खराब’ शुक्रबारबाट मुलुकका ८ दर्जन सिनेमा हलमा रिलिज भएको छ । उनले ६ वर्षपछि यो चलचित्र निर्देशन गरेका हुन् । यो चलचित्रमा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको पनि अभिनय छ ।
निर्देशक निश्चल बस्नेत र अभिनेत्री सुपुष्पा भट्ट पनि सिनेमाको एक गीतमा विशेष भुमिकामा देखिएका छन् । आकाश बरालको लेखन र मनोज पण्डित स्क्रिप्ट डाक्टर रहेको सिनेमा राजनीतिक विषयमा केन्द्रित रहेर निर्माण भएको हो । सिनेमामा रौनक विक्रम कडेल निर्माता र सुरज बम ठकुरी कार्यकारी निर्माताको रुपमा रहेका छन् । यो चलचित्रको रिलिज अघि ललितपुरको लमिम मलको क्युएफएक्स हलमा प्रिमियर शो गरिएको थियो । प्रिमियर शोमा सिनेमाकर्मीदेखि राजनीतिकर्मीसम्मले सिनेमा हेरेका छन् ।
उपसभामुख इन्दिरा राना, काठमाडौं महानगरका प्रमुख बालेन्द्र शाह, रास्वपा सभापति रवि लामिछाने, सांसद ज्ञानेन्द्र शाही, सोबिता गौतम, हरि ढकालसहित कलाकारहरु हरिवंश आचार्य, दीपकराज गिरी, दीपाश्री निरौला, अशोक शर्मा, सन्तोष सेन, विनय श्रेष्ठ, भोलाराज सापकोटा, क्रिकेटरहरु पारस खड्का र रोहित पौडेललगायतले प्रिमियरमा फिल्म हेरेर राम्रो प्रतिक्रिया दिए ।
प्रिमियर पश्चात निश्चल बस्नेतले देशकै लागि सिनेमा बनाएको भन्दै हाँस्य कलाकार हरिवंश आचार्यले प्रशंसा गरेका थिए । उनले भने, ‘अहिले देशमा चरम निराशा र जनतालाई पीरको एउटै कारण छ, भ्रष्टाचार । भ्रष्टाचारलाई निर्मुल पार्नुपर्छ र भ्रष्टचारीलाई सत्तामा बस्न दिनु हुन्न भन्ने मूल मन्त्र आगामी चुनावमा लागू होस् । यो सिनेमा निर्देशक र लेखकले देशकै लागि बनाउनुभएको हो । सबै दृष्टिकोणले राम्रो छ ।’
रास्वपाका सभापति तथा पूर्वगृहमन्त्री रवि लामिछानेले सिनेमा हेर्नैपर्ने बनेको बताए । ‘सिनेमा हेर्न लायक मात्र होइन, हेर्नैपर्ने छ । यसरी नै सिनेमा, संगीत, छोटा सिनेमाबाट मुलुकको अवस्था चित्रण गरेर परिवर्तन ल्याउन सकिन्छ । कसैले हेर्न छुटाउन नहुने सिनेमा हो । र, कोही नछुटोस’ उनले भने । सिनेमाले उठाएको कथावस्तुका कारण आफू प्रचारमा हिँड्न पनि तयार रहेको उनको भनाई छ ।
राष्ट्रिय क्रिकेट टिमका कप्तान रोहित पौडेलले सिनेमाले दिन खोजेको सन्देश मन परेको बताए । धेरैपछि नेपाली सिनेमा हेरेका उनले भने – ‘सिनेमा रमाइलो लाग्यो । राम्रो बनेको छ । सन्देश राम्रो दिएको छ । अभिनय पनि सबै कलाकारको एकदमै राम्रो छ । मलाई दयाहाङ राई र अर्पण थापा दाईको अभिनय एकदमै मनपर्यो ।’ उनले आफू दयाहाङ राईको ठूलो फ्यान रहेको समेत बताए ।
क्रिकेटर कुशल भुर्तेललाई पनि सिनेमाले दिएको सन्देश मन परेको बताए । अर्का क्रिकेटर सोमपाल कामीले भने सिनेमामा निश्चल बस्नेतको इन्ट्री बबाल लागेको सुनाए । ‘मलाई निश्चल दाईको इन्ट्री बबाल लाग्यो । म ठूलो फ्यान हुँ । सिनेमाको कथा राम्रो छ । हामीजस्तो युवाले धेरै कुरा सिक्छौं । जसरी हामी १० वर्षपछि विश्वकप पुथ्यौं, त्यसरी नै सिनेमाले पनि सफलता पाओस्,’ उनले भने ।
प्रतिनिधि सभाको उपसभामुख इन्दिरा राना मगरले सिनेमा समसामयिक विषयमा बनेको बताउँदै राम्रो सन्देश पनि दिएको बताइन् । अभिनेत्री प्रकृति श्रेष्ठले सिनेमा हेर्नुपर्ने बनेको र धेरैपछि राम्रो सिनेमा हेर्न पाएकोमा खुसी व्यक्त गरिन् । त्यस्तै, अर्की अभिनेत्री शिल्पा मास्केले पनि सिनेमा राम्रो बनेको बताउँदै सन्देशमुलक पनि रहेको बताइन् ।
प्रिमियरमा प्राप्त सकारात्मक प्रतिक्रियाले उत्साहित देखिएकी अभिनेत्री स्वस्तिमा खड्काले आफू निर्देशक तथा पति निश्चल बस्नेतका लागि ‘नर्भस’ रहेको बताइन् । ‘निश्चलले इमानदारिताका साथ कथा भनोस् भन्ने थियो । धमाका पनि होस् भन्ने छ । किनकि, ऊप्रति मानिसको ठूलो विश्वास छ । म सिनेमा रिलिजको बेला धेरै तनाब लिन्नँ । तर, यसपटक म निश्चलका लागि एकदमै ‘नर्भस’ छु,’ उनले भनिन् ।
निश्चलले भने आफूभित्र वर्षौंदेखि गुम्सिएको चीज र देखेका तथा भोगेका कुरालाई जोडेर कथा बनाएको बताए । उनले भने, ‘मैले एउटा इमानदार कथा भन्ने प्रयास गरेको हुँ । त्यो भन्दै गर्दा सिनेमाले दर्शकलाई मनोरञ्जन पनि दिनुपर्छ । मनोरञ्जन दिएर आफ्नो उकुसमुकुस पोख्न सकिन्छ भने प्रयास गर्छु भने सिनेमा बनाएको हुँ ।’ अब निर्देशनमा फर्किन धेरै समय नलिने पनि निश्चलले बताएका छन् ।
