ब्युटी न्युज नेपाल
काठमाडौं, ८ कात्तिक
चलचित्र ‘दिमाग खराब’ यही २४ कात्तिकबाट रिलिज हुने भएको छ । यो चलचित्रको नयाँ गीत सार्वजनिक गरिएको छ । ‘हितैको माया…’ गीतको भिडियो सार्वजनिक गरिएको हो । गीतमा जयन जे सुब्बाको शब्द रचना तथा संगीत एवम् सुगम पोखरेल र इन्दकला राईको स्वर रहेको छ ।
निश्चल बस्नेत निर्देशित यो सिनेमाका मुख्य अभिनेता खगेन्द्र लामिछाने र अभिनेत्री स्वस्तिमा खड्का र रमा थपलियाले यस गीतको भिडियोमा अभिनय गरेका छन् । गीतको अडियो र भिडियो सशक्त लाग्छ । सार्वजनिक गीतले दर्शकलाई सिनेमा हेर्न उत्सुकता पैदा गर्ने देखिन्छ । गीतका शब्द पनि मार्मिक सुनिन्छ । जसले दर्शकको मन छुने अनुमान गर्न गाह्रो पर्दैन् । आफ्नो जलेको घरलाई पुन निर्माण गर्न यी तीन पात्रले गरेको सँघर्ष यो गीतको भिडियोमा समेटिएको छ । अझ चप्पल विनाका खगेन्द्रलाई बोकेर हिँडेका दयाहाङको मित्रताको दृश्यले मन छुन्छ ।
सिनेमाको यसअघि सार्वजनिक पोस्टर, टिजर र ट्रेलरले दर्शकमाझ निकै राम्रो हाइप निर्माण गरेको छ । सिनेमा कात्तिक २४ गते नै नेपाल बाहेक विश्वभरका धेरै देशमा रिलिज हुँदैछ । एमएसएम इन्टरटेनमेन्ट सिनेमालाई विश्वभर रिलिजको जिम्मेवारी लिएको छ ।
सिनेमा आट्र्स र ब्ल्याक हर्स पिक्चर्सको निर्माण रहेको सिनेमामा खगेन्द्र लामिछाने, दयाहाङ राई, स्वस्तिमा खड्का, अपर्ण थापा, विजय बराल, सुमन कार्की, पुष्कर गुरुङ, माओत्से गुरुङ, राजन खतिवडा, रमा थपलिया, गौरभी आरएल सिंह, गीत अधिकारी, कृष्णभक्त महर्जन, धीरज भट्ट, राहुल सिवाकोटी, नविन खड्कालगायतको पनि अभिनय छ । निर्देशक निश्चल बस्नेत र भिनेत्री सुपुष्पा भट्ट पनि सिनेमाको एक गीतमा विशेष भुमिकामा देखिएका छन् ।
आकाश बरालको लेखन र मनोज पण्डित स्क्रिप्ट डाक्टर रहेको सिनेमा राजनीतिक विषयमा केन्द्रित रहेर निर्माण भएको हो । तिहारको अवसर पारेर प्रदर्शनमा आउने सिनेमामा रौनक विक्रम कँडेल निर्माता र सुरज बम ठकुरी कार्यकारी निर्माताको रुपमा रहेका छन् ।
सिनेमामा सुसन प्रजापतिको छायांकन, निमेष श्रेष्ठको सम्पादन, राजकुमार उप्रेतीको द्वन्द्व निर्देशन तथा रोहित शाक्यको ब्याकग्राउन्ड स्कोर छ । सिनेमालाई काठमाडौं भित्र गोविन्द शाहीको काफिया फिल्मस् र मोफसलमा मनोज राठी एवम् उज्वल पौडेलले वितरण गर्दैछन् ।
