ब्युटी न्युज नेपाल
काठमाडौं, ५ कात्तिक
चलचित्र ‘बिच्छेद’को गीत गाजले…को भिडियो सार्वजनिक गरिएको छ । बडा दशैंको अबसर पारेर यो गीतको भिडियो सार्वजनिक गरिएको हो । गीतमा राम अविरल बिस्टको शब्द, एसडी योगीको सङ्गीत तथा योगी र ऋतिका श्रेष्ठको स्वर रहेको छ । गीतको भिडियोमा मुकुन भुसाल र लक्ष्मी बर्देवाको अभिनय छ । यो गीतको भिडियोमा सुरेन बसेलको कोरियोग्राफी छ ।
मङ्सिर ८ मा रिलिज हुने यो चलचित्रको रिलिज मिति घोषणासँगै प्रचार प्रचारको कार्य तिब्ररुपमा सुरु गरिएको छ ।
यो चलचित्रलाई सत्यराज चौलागाईँले निर्देशन गरेका हुन् । उनका अनुसार ’बिच्छेद’ नेपाल रिलिजसँगै अन्य विभिन्न मुलुकहरूमा समेत एकसाथ प्रदर्शनको तयारी भइरहेको छ । अभिनेता मुकुन भुसालले लेखेको कथामा निर्देशक चौलागाईँले पटकथा लेखेका छन् । गाउँले परिवेशमा आधारित रहेको यो चलचित्रको छायाङ्कन रामेछापको एक गाउँमा गरिएको छ ।
मुकुन र लक्ष्मीसँगै यो चलचित्रमा सुष्मा निरौला, प्रिया रिजाल, लय सङ्ग्रौला, हिउँवाला गौतम, सरिता राजोपाध्याय, लक्ष्मीनाथ तिमिल्सिना, जीवन थापा, जयराम सापकोटा लगायतका कलाकारहरूको अभिनय रहेको छ । सङ्कल्प भुजेलको छायाङ्कन, भूपेन्द्र अधिकारी को सम्पादन रहेको छ । समीर मियाको भिएफएक्स, किरण तुलाधरको ब्याकग्राउन्ड स्कोर र रेनिश फागोको कलर ग्रेडिङ रहेको छ ।
चलचित्रका गीतमा एसडी योगी, सुरज थापा र आशिश महरको सङ्गीत, सत्यराज चौलागाईँ र राम अविरल विष्टको शब्द रचना रहेको छ भने एसडी योगी, सुनिता थेगिम, ऋतिका श्रेष्ठ, सुरज थापा र आशिश महरको स्वर रहेको छ ।
चलचित्रका निर्माताहरू राज कुमार पण्डित, दिमेश श्रेष्ठ सुवास राई र सावित्री बज्राचार्य हुन् । सह निर्माता प्रबिन राजथला हुन् । नवीन पुरीले प्रोडक्शन डिजाइन गरेको यस चलचित्रलाई काठमाडौँ उपत्यकामा रिच इन्टरटेन्मेन्ट र उपत्यका बाहिर एफडी कम्पनीले वितरण गर्दैछन् ।
