ब्युटी न्युज नेपाल
काठमाडौं, २ साउन
आगामी १० भदौबाट रिलिज हुने चलचित्र राधा (द सिक्रेट अफ लभ) को तिज भाकाको गीत यतीबेला दर्शकमाझ आएको छ । यो गीतलाई ओएसआर डिजिटल च्यानलबाट रिलिज गरिएको छ ।
सोमबार काठमाडौंमा एक समारोहबीच यो चलचित्रको तीज गीत पाउमा पाउजु…को भिडियो रिलिज गरिएको हो ।
कालिप्रसाद बासकोटाले संगीत गरेको यो गीतलाई सृजना खत्री (हाउडे माया)ले लेखेकी हुन् । गीतमा सज्जा चौलागाई र स्वस्तिका ढकालको स्वर रहेको छ । यी दुबै गायिकाले यही गीतबाट चलचित्र गायनमा डेब्यु गरेको कार्यक्रममा बताएका छन् ।
गीतको भिडियोमा राधाकी मुख्य नायिका सृष्टी श्रेष्ठ र अभिनेत्री प्रियँका कार्कीको नृत्य रहेको छ । सन्तानकी आमा भएपछि यही गीतबाट अभिनेत्री प्रियँका चलचित्रमा फेरी फर्किएकी छिन् । गीत निकै राम्रो भएकाले आफुले यसमा नृत्य गरेको उनले कार्यक्रममा बताईन् ।
यो गीत चलचित्रको कथामा रहने निर्देशक सुवर्ण थापाले कार्यक्रममा बताए । तीजको अबसरमा यो चलचित्र रिलिज हुन लागेकोले प्रोमोसन गीतको रुपमा चलचित्रमा तीज गीत राखिएको पनि निर्देशक थापाले कार्यक्रममा प्रकाश पारे । बिदेश गएका श्रीमानको प्रतिक्षामा रहेकी श्रीमतीको कथामा यो चलचित्र केन्द्रित रहेको पनि उनले बताए ।
यो चलचित्रलाई अभिनेता सौगात मल्लले निर्माण गरेका हुन् । यही चलचित्रबाट उनी फिल्म निर्माणमा आएका छन् । चलचित्रको कथा निकै प्रभावशाली भएका कारण आफु निर्माणमा उत्रिएको उनले बताएका छन् । राधामा सौगात सहित दयाहाङ राई, सृष्टी श्रेष्ठ, खगेन्द्र लामिछाने, निश्चल बस्नेत, दिब्यदेव पन्त, बुद्धी तामाङ, लोकेन्द्र लेखकलगायतको मुख्य भूमिका छ ।
सौगात मल्ल चलचित्र निर्माणमा उत्रिएको र निर्देशक सुवर्ण थापाले निकै राम्रो कथामा राधा निर्माण गरेका कारण आफुहरु यो फिल्ममा जोडिएको कार्यक्रममा निश्चल, खगेन्द्र र दिब्यदेवले बताए ।
