ब्युटी न्युज नेपाल
काठमाडौं, १४ फागुन
हाल फरार रहेका अभिनेता पल शाह अभिनीत फिल्म ‘म यस्तो गीत गाउँछु २’ का निर्देशक तथा निर्माता सुदर्शन थापालाई प्रहरीले आज दिउँसो नियन्त्रणमा लिएको छ । अभिनेता पल शाहको बारेमा सोधपुछ गर्नका लागि प्रहरीले शनिवार नियन्त्रणमा लिएको बताईएको छ ।
पत्रकार ऋषी धमलाका अनुसार निर्देशक सुदर्शन दिउँसो १ बजे प्राईम टाइम टेलिभिजनको कार्यक्रम ‘धमलाको हमाला’ मा अन्तर्वार्ता दिन पुगेका थिए । उनले अन्तरवार्ता दिएर प्राईम टेलिभिजनको कार्यालयबाट बाहिर निक्लने क्रममा सोधपुछका लागि भन्दै सुदर्शनलाई प्रहरीले नियन्त्रणमा लिएको धमलले बताएका छन् । प्रहरीले सुदर्शनको फोन समेत नियन्त्रणमा लिएर छ । महानागरीय प्रहरी बृत्त नयाँ बानेश्वरमा सुदर्शनलाई अहिले प्रहरीले सोधपुछ गरिरहेको छ । अभिनेत्री पूजा शर्मालाई पनि सोधपुछका लागि नियन्त्रणमा लिने तयारीमा प्रहरी छ ।
जबर्जस्ती करणीको अरोपमा १७ वर्षिय नाबालिग गायिकाले तनहुँ (दमौली) को जिल्ला प्रहरी कार्यालयमा पल शाह बिरुद्ध जाहेरी दिएकी छिन् । बुधबार बेलुकाबाट पल शाह फरार छन् । प्रहरीका अनुसार, पलको अन्तिम लोकेसन बुधबार राति साढे १० बजे बालकुमारीमा देखिएको थियो । सो समयमा उनले मोवाइल अन गरेका थिए ।
करणीको आरोपमा जाहेरी परेपछि प्रहरीले पललाई तीव्र रुपमा खोजिरहेको छ । प्रहरीले देशभरका प्रहरी कार्यालयमा उनलाई पक्राउ गर्न सर्कुलर समेत जारी गरेको छ । तर, तीन दिन वितिसक्दा पनि उनी पक्राउ पर्न सकेका छैनन् ।
