ब्युटी न्युज नेपाल
काठमाडौं, १९ साउन
चलचित्र साइनोले सेन्सरबोर्डबाट पिजी (प्यारेन्स गाईडेड) सर्टिफिकेट पाएको छ । सेन्सर बोर्डले साइनो हेर्न १६ वर्ष मुनिका दर्शकले अभिभावकको साथ लिनुपर्ने भनेको छ ।
नेपाली चलचित्रकी प्रथम नायिका भुवन थापा चन्दले निर्माण गरेको चलचित्र साईनो यहि २४ साउनबाट मुलुकका सिनेमा हलमा प्रदर्शन हुने भएको छ । चन्द्र बिनायक फिल्म प्रोडक्सनको ब्यानरमा निर्मित चलचित्र साइनोमा नीता ढुंगाना, मिरुना मगर, राज कुमार, भुवन थापा चन्द, बसुन्धरा भुषाल, मदनदास श्रेष्ठ, राजा राजेन्द्र पोखरेल, रोयदीप श्रेष्ठ, श्याम राई, रेगन क्षेत्री लगायतका अन्य कलाकारहरुको अभिनय छ ।
चलचित्र साइनोले पिजी सर्टिफिकेट पाएपछि पनि निर्देशक रमेश थापाले चलचित्र सबै उमेरका दर्शकले निर्धक्कका साथ हेर्न सकिने बताए । उनले सेन्सर बोर्डको काम नै चलचित्र हेरेर सर्टिफिकेट दिने भएकाले यसबारेमा केहि नबोल्ने बताए । तर उनले चलचित्र साइनो मौलिक, सामाजिक कथावस्तु बोकेको शुद्ध नेपाली चलचित्र भएको दाबी गरे ।
शरण थापा कार्यकारी निर्माता रहेको चलचित्र साइनोमा रामेश्वर कार्कीको छाँयांकन, रामजी लामिछानेको कोरियोग्राफी, बनिश शाहको सम्पादन छ ।
