ब्युटी न्युज नेपाल
काठमाडौँ, १९ असोज
लेखक अनुपम रोशीको नयाँ कृति ‘भगः एक मौन ब्रह्माण्ड’ काठमाडौँमा आयोजित एक समारोहबीच विमोचन गरिएको छ। अस्तित्व, शरीर, सत्ता, समाज, मृत्यु, चेतना र आध्यात्मिकताजस्ता विषयलाई दार्शनिक दृष्टिकोणबाट प्रस्तुत गरिएको कृतिलाई वक्ताहरूले समकालीन नेपाली साहित्यमा गम्भीर चिन्तन र बहसको सम्भावना बोकेको पुस्तकका रूपमा व्याख्या गरेका छन्।
विमोचन समारोहमा युग पाठक, सगुना शाह र राम लोहनीले कृतिमाथि धारणा राखेका थिए। युग पाठकले पुस्तकले स्थापित निष्कर्षलाई अन्तिम सत्यका रूपमा प्रस्तुत नगरी पाठकलाई प्रश्न गर्न र आफ्नै दृष्टिकोणबाट जीवन तथा समाजलाई बुझ्न प्रेरित गर्ने बताए। उनका अनुसार कृतिका निबन्धले बौद्धिक बहसभन्दा पर पुगेर पाठकको अनुभूति र चेतनालाई समेत स्पर्श गर्छन्।
सगुना शाहले पुस्तकको भावनात्मक तथा दार्शनिक गहिराइको प्रशंसा गर्दै यसमा पाठकले आफ्नै जीवन र अस्तित्वका अनुभूति भेट्टाउन सक्ने बताइन्। विशेषगरी मृत्यु, महिला अस्तित्व र समानतासम्बन्धी विचारले आफूलाई गहिरो रूपमा प्रभावित गरेको उनको भनाइ थियो।
त्यसैगरी राम लोहनीले कृतिमा आध्यात्मिक खोज र स्वत्वको पहिचानसम्बन्धी चिन्तन सशक्त रहेको उल्लेख गरे। पुस्तकका विषयवस्तु र शीर्षकले पाठकलाई रोकेर सोच्न बाध्य बनाउने उनले बताए।
वक्ताहरूले रोशीको काव्यात्मक भाषा, दार्शनिक गहिराइ र प्रश्न गर्ने शैलीको प्रशंसा गर्दै कृतिले समकालीन समाजसँग संवाद गर्ने धारणा व्यक्त गरे। शिक्षा बुक्सद्वारा प्रकाशित ‘भगः एक मौन ब्रह्माण्ड’को मूल्य ६९५ रुपैयाँ रहेको छ।
