ब्युटी न्युज नेपाल
काठमाडौं, १५ पुस
धादिङको धुनिबेसी नगरपालिकामा एक सातादेखि जारी रहेको ‘धुनिबेसी बहुउदेश्यीय नगर महोत्सब २०८०’ मा शनिबार दर्शकको घुईँचो थियो । अरु दिन झैं शनिबार पनि विभिन्न कलाकारले गायन एवम् नृत्य प्रस्तुत गरेर महोत्सबको रौनक बढाए । शनिबार सो महोत्सबमा केन्द्रिय र स्थानीय गरेर एक दर्जन भन्दा बढी कलाकारहरुले आफ्नो प्रस्तुति दिए ।
महोत्सबमा शनिबार अपरान्ह तिर गायक नविन कुमार पौडेलले आफ्नो चर्चित गीत अठार कट्यौ की कटेनौ… प्रस्तुत गरेका थिए । उनको प्रस्तुतिमा दर्शकले साथ दिएका थिए । यस्तै सोही कार्यक्रममा गायिका सरिता भारतीले आफ्नो चर्चित गीत मेरो दिलको राजा…प्रस्तुत गर्दै दर्शकलाई नचाईन् ।
यस्तै अभिनेता प्रवण भुसालले सो महोत्सबलाई शुभकामना दिएका थिए । अग्रज लोक गायक नवराज ढुँगानाको संयोजनमा सम्पन्न सो महोत्सबको ढुँगानाको प्रस्तुतिमा पनि दर्शक रमेका थिए । महोत्सबको सो सांस्कृतिक कार्यक्रममा ढुँगानाले कार्यक्रमको सांस्कृतिक पक्षबारे जानकारी गराए ।
यस्तै अग्रज गायक बिष्णु खत्रीले आफ्ना चर्चित गीतहरु गाएर दर्शकलाई नचाए । गायक सुवास महतले सञ्चालन गरेको सो सांगीतिक कार्यक्रममा गायक कैलाश कार्की, गायिका सरु गौतमले पनि आफ्ना गीतबाट दर्शकको मन जितेका थिए । मोडल टिका जैशीको नृत्य प्रस्तुति पनि निकै आकर्षक थियो । १६ पुससम्म चल्ने सो महोत्सबमा हरेक दिन गायन, नृत्य, प्रहसन एवम् विविध सांस्कृतिक कार्यक्रम हुने गरेको सांस्कृतिक कार्यक्रम सह संयोजक सिम्रन दुलालले जानकारी गराईन् ।
महोत्सबमा विभिन्न स्टल तथा मनोरञ्जन पूर्ण विभिन्न खेलहरु पनि राखिएको छ । चर्चित गायक गायिकाको गायन एवम् कलाकारको नृत्यमा रमाउँदै, झुलामा झुल्दै दर्शकहरुले महोत्सबमा मनोरञ्जन लिने क्रम जारीरहेको आयोजक धुनिबेसी युवा क्लबले जानकारी गराएको छ ।
तस्बिर : बद्री थापा/ब्युटी न्युज नेपाल
