ब्युटी न्युज नेपाल
काटमाडौं, १२ जेठ
अमेरिकामा विभिन्न कन्सर्ट गरेर नेपाल फर्किय लगत्तै गायक रामकृष्ण ढकालले आफ्नो स्वरमा नयाँ गीत ‘म हराएँ मनमनैमा’ को भिडियो दर्शकमाझ ल्याएका छन् । बिहिबार काठमाडौंमा एक समारोहबीच यो गीतको भिडियो सार्वजनिक गरिएको हो । सन्तोष भट्टराईको शब्द रचना र हरी लम्सालको संगीत रहेको छ । सुरज श्रेष्ठले गीतको एरेञ्ज गरेका हुन् ।
यो गीतको भिडियोलाई पर्यटकीय क्षेत्र मुस्ताङमा छायांकन गरिएको छ । गीतको भिडियोमा गरिमा शर्मा र दिपेश ढकालको अभिनय छ । उनीहरु रोमान्चकारी रुपमा प्रस्तुत छन् । दिपेशले अभिनय गरेको यो पहिलो म्यूजिक भिडियो हो । रामकृष्ण ढकालको गीतमा गरिमा शर्मासँग स्क्रिन शेयर गर्न पाउँदा मोडल ढकालले खुशी व्यक्त गरे । गायक ढकालले नयाँ नयाँ प्रतिभावान् कलाकारहरु माझ आफ्नो गीतमा काम गर्नु आफैमा सुखद रहेको बताए ।
मोडल गरिमा शर्माले आफ्नो बाल्यकालदेखिको मनपर्ने गायकको गीतमा अभिनय गर्न पाउनु आफ्नो सौभाग्य रहेको बताइन् । गीतको अडियोले आफूलाई काम गर्न लोभ्याएको उनको भनाई छ । गायक ढकालले भने आफूले आफ्ना गीतहरु दोहो¥याएर कमै सुन्ने गरेको भए पनि ‘म हराएँ मनमनैमा’ गीत धेरै पटक सुनिसकेको बताए । गीतको शब्द र संगीतले मन छोएको बताउँदै उनले भिडियो पनि सुन्दर बनेको प्रतिक्रिया दिए ।
भिडियोका निर्देशक सुब्रत आचार्य हुन् । भिडियोमा साइब्रत आचार्यको स्टोरी बोर्ड, विकास दाहालको सम्पादन, उत्सव दाहालको छायांकन रहेको छ । गीतको क्रियटिभ हेड जया शर्मा हुन् । यो गीतसँगै निर्देशक आचार्यले मुस्ताङमा गायक ढकालको आवाजमा रहेको अन्य दुई गीत ‘काली’ र ‘सयौं कारण’को पनि छायांकन गरेका छन् । यी दुई दिन केही दिनमा सार्वजनिक हुने बताइएको छ ।
