ब्युटी न्युज नेपाल
काठमाडौं, २९ भदौ
क्वालिटी इन्टरटेनमेन्ट अवार्ड २०७८ यही १३ असोजमा काठमाडौंको नाचघरमा आयोजना हुने भएको छ । सो अवार्डको फाईनलको तयारी हुँदै गर्दा यसको विभिन्न विधामा उत्कृष्ट मनोनयनमा पर्नेहरुलाई काठमाडौंमा एक समारोहबीच मनोनयनको प्रमाणपत्र प्रदान गरिएको छ ।
चलचित्र विकाश बोर्डका अध्यक्ष दयाराम दाहाल, पूर्व प्रधान सेनापति राजेन्द्र क्षत्री, समाजसेवी तथा ब्यबसायी ज्ञान बहादुर लामा, चलचित्र निर्माता निर्देशक नरेश पौड्याल, नेपाल चलचित्र तथा म्युजिक प्रोड्युसर एसोसियसनका अध्यक्ष निर्मल ढकाल, गायक शिब परियार, चलचित्र पत्रकार संघका उपाध्यक्ष जीवन पराजुली, इभेन्ट डिरेक्टर निशुकान्त झा, संगीतकार डिका गुरुङसहित विभिन्न अतिथिहरुले काठमाडौंमा एक समारोहबीच क्वालिटी इन्टरटेनमेन्ट अवार्डमा मनोनयनमा परेकाहरुलाई प्रमाणपत्र प्रदान गरेका हुन् ।
चलचित्र, गीत, संगीत, म्युजिक भिडियोको विभिन्न विधामा यो अवार्ड प्रदान गरिने भएको छ । यो अवाडको अहिले गीत संगीत अन्तर्गत लोक, आधुनिक, पप अधुनिक, लोक दोहोरी, पर्व गीत, भेग विशेष गीत, राष्ट्रिय भावका गीतबाट गायक गायिका, संगीतकार, गीतकार, संगीत संयोजक, ध्वानी मिश्रण जस्ता विधामा मनोनयनमा परेकाहरुलाई प्रमाणपत्र प्रदान गरिएको छ ।
यस्तै म्युजिक भिडियो अन्तर्गत निर्देशक, मोडल महिला/पुरुष, छायाँकार, सम्पादक जस्ता विधामा अवार्ड प्रदान गरिँदै छ । यिनै विधाको मनोनयन सुची क्वालिटी फिल्मले गत बुधबार सार्वजनिक गरेको थियो ।
यसैगरी चलचित्र विधामा पनि क्वालिटी इन्टरटेनमेन्ट अवार्डको लागि २०७५ र २०७६ सालका फिल्महरुको मनोनयनमा परेकाहरुलाई पनि प्रमाणपत्र प्रदान गरिएको छ । जसमा निर्देशक, नायक, नायिका, नवनायक, सहनायक, खलनायक, चरित्र अभिनेता, हास्य अभिनेता, छायाँकार, सम्पादक, रँग सँयोजक, संगीतकार, भिएफएक्स आर्टिस्ट, प्रोडक्सन म्यानेजर जस्ता विधामा मनोनयनमा परेकाहरुलाई पनि प्रमाणपत्र प्रदान गरिएको छ ।
दोश्रो लहरको कोरोनाका कारण सुस्ताएको नेपाली चलचित्र तथा गीत संगीतको बजारलाई चलायमान बनाउन आफुहरुले यो अवार्ड आयोजना गरेको क्वालिटी फिल्म्स्का अध्यक्ष तथा म्युजिक भिडियो निर्देशक उमेश गुरुङले कार्यक्रममा बताए । सो कार्यक्रमलाई फेसन तथा पेजेन्ट कोरियोग्राफर अश्विनी कान्त झाले सञ्चालन गरेका थिए ।
