ब्युटी न्युज नेपाल
काठमाडौं, २९ फागनु
चलचित्र ‘लम्फु’ का नायक कवीर खड्का ‘भन्दैछ मन’ गीतको भिडियोमार्फत् दर्शकमाझ आएका छन् । प्रेम विछोडमा तड्पिएको चरित्र निर्वाह गरेका कवीरलाई भिडियोमा मिहारिका आचार्यले साथ दिएकी छन् ।
प्रसिद्ध चुडालको एकल गायन रहेको यो गीतको रचना पनि चुडालले विरोध बुर्लाकोटीसँगको सहकार्यमा लेखेका हुन् । नायिका सारा सिरपालीसँग फिल्म ‘गुन्जन’ मार्फत् आउन लागेका कवीरले आफु फिल्म अभिनयमा नै लक्ष्यित भएपनि ‘भन्दैछ मन’ गीत मन परेकोले खेलेको बताए । कवीरले भने, ‘गीतले बोकेको भाव र मर्मले मलाई पनि छोयो । गीतको भावलाई भिडियोमार्फत् अझ सुन्दर कथा भन्न सकिन्छ भन्ने लागेरै खेल्न उत्साहित भएको हुँ ।’
भिडियोलाई प्रवेश पौडेलले निर्देशन गरेका हुन् । ‘अमेरिका ब्वाइज’ का निर्देशक प्रवेशको ‘भन्दैछ मन’ पहिलो म्युजिक भिडियो निर्देशन हो । उनले म्युजिक भिडियोलाई पनि फगत टे«न्डिंगको लोभले मात्रै भन्दा पनि गीतको भाव अनुसार कथा भन्न सकेमा गीत संगीतप्रति न्याय हुने तर्क गरे ।
काठमाडौं आसपास छायांकन गरिएको भिडियोलाई आलोक शुक्लाले खिचेका हुन् । फिल्म छायांकार आलोकले पनि ‘भन्दैछ मन’ बाटै पहिलो पटक म्युजिक भिडियोमा काम गरेका हुन् । नविन निरौलाको सम्पादन रहेको भन्दैछ मन बोलको भिडियो शुक्रबार ओएसआर डिजिटलमार्फत् सार्वजनिक गरिएको हो ।
