रिलिज चलचित्र
ब्युटी न्युज नेपाल
काठमाडौं, २० बैशाख
मह जोडीको यो वर्षको प्रतीक्षारत चलचित्र दाल भात तरकारी आज शुक्रबारबाट मुलुकका एक सय १० ओटा सिनेमा हलमा रिलिज भएको छ ।
काठमाडौं र मोफसलका हलहरुमा यो चलचित्रको दुई दिन अघि नै बुकिङ खोलिएको थियो । यसको अग्रिम टिकट बुकिङ पनि आक्रमक छ । शुक्रबार काठमाडौंका ६० प्रतिशत शोहरु अग्रिम हाउसफुल भईसकेको निर्माता किरण केसीले जानकारी गराएका छन् ।
काठमाडौंका कुमारी, क्युएफएक्स सिभिल मल, लविम मल, क्युज, बिएरआर लगायतका सिनेमा हलमा शुक्रबार दिउँसो साँझको शो अग्रिम बुकिङ फुल भईसकेको छ । चितवनको जल्मा हलमा पनि तीन ओटा शो अग्रिम हाउसफुल भईसकेको यसका किरण केसीले जानकारी गराएका छन् । उनका अनुसार अघिल्लो चलचित्र शत्रुगते भन्दा आक्रमक र धेरै अग्रिम बुकिङ दाल भात तरकारीको भईरहेको छ ।
यो चलचित्रको शुक्रबार बिहान कुमारी हलमा विशेष प्रदर्शनी राखिएको थियो । सिनेकर्मीदेखि सञ्चारकर्मीसम्मले दाल भात तरकारी हेरेर राम्रो प्रतिक्रिया दिए । एउटा राम्रो सामाजिक चलचित्र बनेको उनीहरुको भनाई थियो ।
नेपालीहरुको बिदेश पलायनको लहर चलेपछि त्यसलाई रोक्न महजोडी मह सञ्चारले यो चलचित्र निर्माण गरेको हो । यसलाई अग्रज हास्यब्यँग्य कलाकारहरु मदनकृष्ण श्रेष्ठ, हरिबँश आचार्य, किरण केसी, शिबहरि पौडेललगायतले बनाएका हुन् । यो चलचित्रको कथा बरिष्ट कलाकार हरिबँशले लेखेका हुन् ।
चलचित्रलाई सुदन केसीले निर्देशन गरेका हुन् । यसै फिल्म मार्फत सुदनले निर्देशनमा डेब्यु गर्दैछन् । जसमा शम्भुजीत बासकोटाको संगीत छ । चलचित्रको गीतहरु भिजिट भिसामा… र दाल भात तरकारी…अहिले हिट छ । गीत संगीतको कारण पनि चलचित्रलाई फाईदा पुगेको छ ।
यो चलचित्रमा मदनकृष्ण श्रेष्ठ, हरिवंश आचार्य, निरुता सिंह, पुष्प खड्का, प्रियँका कार्की, आँचल शर्मा, बर्षा राउत, शिवहरी पौडेल, बसुन्धरा भुषाल, किरण केसी लगायतका कलाकारको मुख्य भूमिका छ ।
