रिलिज फिल्म
ब्युटी न्युज नेपाल
काठमाडौं, १ चैत
चलचित्र जानी नजानी मुलुकका ७४ ओटा सिनेमा हलमा रिलिज भएको छ । प्रस्तुतकर्ता रोशनी केसीका अनुसार फिल्म हेर्ने दर्शकले साह्रै मन पराएका छन् । उनीहरुबाट राम्रो प्रतिक्रिया पाएको पनि रोशनीले बताएकी छिन् ।
नेपाली फिल्ममा स्थापित प्रेम शैली भन्दा फरक प्रेमकथा यसमा भएकाले पनि दर्शकले पूर्ण आनन्द लिईरहेको पनि प्रस्तुतकर्ता केसीले प्रस्ट पारिन् ।
जानी नजानीलाई बसन्त अधिकारीले निर्देशन गरेका हुन् । यो फिल्ममा आफुहरुले कर्पोरेट स्तरको प्रेमलाई उठान गरेको र फिल्म क्षेत्रमा काम गरेको करिब दुई दशक लामो अनुभव यसमा उतारेको पनि निर्देशक अधिकारीको भनाई छ ।
यो चलचित्रको गीत र ट्रेलर दर्शकले मन पराएका छन् । रोशनी इन्टरटेन्मेनटको ब्यानरमा निर्मित यो फिल्मका निर्माता मोदनाथ खनाल र सागर काजी माली हुन् ।
सामिप्यराज तिमिल्सिनाले लेखेको यो फिल्मलाई संजय लामाले छायाँकन गरेका हुन् । अर्जुन जिसीको सम्पादन रहेको जानी नजानीमा अर्जुन पोखरेलको संगीत रहेको छ ।
चलचित्र जानी नजानीमा मनिष श्रेष्ठ, निरिशा बस्नेत, सन्नी सिंह, नम्रता श्रेष्ठ, प्रकाश अधिकारी, कृष्णभक्त महर्जन, रोशनी केसीसहितका कलाकारको मुख्य भूमिका रहेको छ ।
