ब्युटी न्युज नेपाल
काठमाडौं, १३ फागुन
दोश्रो नेपाल इन्टरनेशनल फिल्म फेस्टिबल २०१९ मा सिँगापुरको फिल्म ‘ए ल्यान्ड इमाजिनेड’ले उत्कृष्ट अन्तर्राष्ट्रिय फिल्मको अवार्ड जितेका छ । यीओ स्यु हुव निर्देशित यो चलचित्रले फिचर फिल्मबाट उत्कृष्ट हुँदै एक हजार डलर सहित गौतम बुद्ध अवार्ड जितेको छ ।
काठमाडौंको भृकुटी मण्डप स्थित राष्ट्रिय सभागृह र नेपाल पर्यटन बोर्डमा आयोजित यो महोत्सबमा अन्तराष्ट्रिय प्रतिस्पर्धा अन्तर्गत शर्ट फिल्म तर्फ भारत र बँगलादेशको सँयुक्त सर्ट फिल्म ‘मिन आलाप’ले उत्कृष्ट लघु चलचित्रको अवार्ड जित्यो । यो फिल्मले पाँचसय अमेरिकी डलर सहित माउण्ट एभरेस्ट अवार्ड अवार्ड प्राप्त ग¥यो । यो फिल्मलाई सुवर्ण सन्जुती तुसीले निर्देशन गरेका थिए ।
नेपाली पानोरामा अन्तर्गत नै सेनाङ ग्याम्जो तामाङले निर्देशन गरेको भिक्षु सम्बन्धी निकै रोचक लघु फिल्म ‘सुपरमँक’ले उत्कृष्ट नेपाली शर्ट फिल्मको अवार्ड सहित २५ हजार रुपैयाँ पायो । यस्तै नेपाली पानोरामा अन्तर्गत नै नरेश कुमार केसी निर्देशित तथा रविन आचार्य निर्मित एवम् आचार्यले छायाँकन गरेको चलचित्र ‘डाईङ क्यान्डिल’ले उत्कृष्ट चलचित्रको अवार्ड जित्दै ५० हजार रुपैंया पायो ।
यस्तै उत्कृष्ट फिल्म निर्देशकको अवार्ड पनि ‘डाईङ क्यान्डिल’बाटै नरेश कुमार केसीले नै पाए । यस्तै उत्कृष्ट पटकथाको अवार्ड चलचित्र ‘पञ्चायत’बाट सो चलचित्रका निर्देशक एवम् लेखक शिबम अधिकारीले पाए । उपप्रधान तथा रक्षा मन्त्री इश्वर पोखरेलले कार्यक्रममा उत्कृष्ट फिल्मलाई अवार्ड प्रदान गरे ।
चलचित्र निर्देशक एवम कलाकार नीर शाहको संयोजकत्वमा भारतका चलचित्रकर्मी प्रेमेन्द्र मजुमदार, चीनको बेजिङ्ग फिल्म एकेडेमीका प्रोफेसर ल्याङ्ग स्याओ र क्यान्स फिल्म फेस्टिभलका प्रोग्राम निर्देशक एन्ने डेलेच लगायत निर्णायक थिए ।
यस्तै फेस्टिलमा नयाँ चलचित्र लेखक निर्देशकलाई लक्षित गरेर उत्कष्ट कथा बाचन प्रतियोगिता पनि आयोजना गरिएको थियो । ‘स्टोरी पिच’ शिर्षकमा गरिएको यो प्रतियोगितामा काशीनाथ कथाबाट दिवस अम्गाईंले र अर्को कथाबाट सजन लोप्चनले जिते । यी दुबैलाई कार्यक्रममा जनही ४० हजार रुपैयाँ प्रदान गरियो ।
दोश्रो नेपाल अन्तराष्ट्रिय चलचित्र महोत्सब सोचेको भन्दा निकै सफल भएको महोत्सब आयोजक समितिका अध्यक्ष एवम् चलचित्रकर्मी केपी पाठकले बताए । महोत्सब आयोजक संस्थाका महासचिब राजु केसीले कार्यक्रममा महोत्सबको उदेश्यबारे प्रकाश पारेका थिए । विभिन्न ३१ राष्ट्रहरुका ६० वटा चलचित्रहरु प्रदर्शनसँगै सोमबारसाँझबाट यो महोत्सब सम्पन्न भएको छ ।
