रिलिज चलचित्र
ब्युटी न्युज नेपाल
काठमाडौं, १८ माघ
एक्सन प्रधान, लभ स्टोरी जनराको फिल्म रणवीर १८ माघ (शुक्रबार) आजबाट मुलुकका ९५ ओटा हलमा एकसाथ रिलिज भएको यसका वितरकहरुले बताएका छन् । विहिबार बेलुका काठमाडौंका कमलपोखरी स्थित क्युएफएक्स कुमारी सिनेमामा भव्य प्रिमियर गरेपछि शुक्रबार बिहानबाट यो फिल्म रिलिज भएको हो ।
काठमाडौंमा एउटा सिँगल हलबाहेक बाँकी सबै २५ ओटा हलमा रणवीर रिलिज भएको उपत्यका वितरक स्टेशन पाईभका अध्यक्ष प्रचण्डमान श्रेष्ठले जानकारी गराएका छन् । यस्तै मोफसलमा ७० ओटा हलबाट रणवीर रिलिज भएको जानकारी यसको मोफसल वितरक एफडी कम्पनीका प्रमुख कपिल द्धाले जानकारी गराए ।
यो चलचित्रमा सुशिल सिटौला, नवोदित अभिनेत्रीद्धय शुभेच्छा खड्का, सुपुष्पा भट्ट, प्रशान्त ताम्राकार, हरिहर शर्मा, टिका पहारी, नरेश पौड्याल, भोलाराज सापकोटा, सैलेश्वरी सिंहसहितको मुख्य भूमिका छ ।
रणबीरमा महेश पौडेलको छायाँकन, कृष्ण भण्डारीको सम्पादन, चन्द्र पन्तको द्धन्द्ध निर्देशन, राजनराज शिवाकोटा, हर्कुलेस बस्नेत, अमित श्रेष्ठको संगीत, रामजी लामिछोन, गम्भिर बिष्ट र सुरेन बस्यालको कोरियोग्राफी छ ।
यस अघि गाजा बाजा जस्तो चलचित्र निर्माण गरिसकेका गोमा बिष्ट थापा र दीपेन्द्र रेग्मीले चलचित्र रणवीर निर्माण गरेका हुन् । देशको अहिलेको समस्या भनेकै गुन्डागर्दी, भ्रष्टाचार, बेथिती भएकाले यो विषयमा एक्सन प्रधान सिनेमा आफुहरुले बनाएको यी दुईले बताएका छन् ।
प्रेम कथामा आधारित एक्सन प्रधान यो चलचित्रमा भ्रष्टाचार, बेथिती, ढिलासुस्ती, अपहरण जस्ता विषयले निमत्याएको समस्या उठाईएको यसका निर्देशक गोविन्द सिंह भण्डारीले बताएका छन् । उनको यो डेब्यु निर्देशन फिल्म हो ।
चलचित्रका अभिनेता शुशिल सिटौलाले यस अघिका फिल्ममा चकलेटी भूमिकामा दर्शकले मलाई हेर्दै आए पनि यसमा रणवीर बनेर आफु मुलुकका बिकृति बिसँगति बिरुद्ध उत्रिएको बताएका छन् ।
नवोदित अभिनेत्री एवम् मिसे नेपाल इन्टरनेशलन २०१२ शुभेच्छा खड्काले यो चलचित्रमा एक जिम्मेवार युवतीको भूमिका आफुले निर्वाह गरेको जानकारी गराएकी छिन् । अर्का अभिनेता प्रशान्त ताम्राकारले एक्सनमा आफुले सबैभन्दा बढी मेहनत गरेको फिल्म नै रणवीर भएको जिकिर गरेका छन् ।
अर्की नवोदित अभिनेत्री सुपुष्पाले यो चलचित्रमा आफु एउटी प्रेमिकासँगै जिम्मेवारी युवतीको भूमिकामा रहेको जानकारी गराईन् ।
