काठमाडौं, २० बैशाख
दुई दशक देखि अभिनय सिकाएर कलाकार जन्माउँदै आएका चलचित्र अभिनेता अनुप बराल अब दर्शकमाझ डन्डीबियोका प्रशिक्षकको रुपमा प्रस्तुत हुने भएका छन् । २१ बैशाख (शुक्रबार)बाट देशव्यापी प्रदर्शनमा आउने चलचित्र ‘डमरुको डन्डीबियो’मा उनी डन्डीबियोका प्रशिक्षकका रुपमा प्रस्तुत भएका छन् ।
‘बाल्यकालमा पोखरामा धेरै नै डन्डीबियो खेलिएको थियो । तर सही रुपमा डन्डीबियो खेल्न र खेलाउन चलचित्र डमरुको डन्डीबियोको क्रममा मात्र जानियो ।’ अभिनेता अनुपले भने,‘डन्डीबियोको पनि आफनै नियम र काईदा हुँदो रहेछ । यो खेल्नका लागि फुटबल र अरु खेलको जस्तै कडा व्यायाम समेत गर्नु पर्दो रहेछ ।’\
यो चलचित्रमा उनी सुरुमा गाउँको एउटा स्कुलको शिक्षकको भूमिकामा छन् । आफ्नै छोराले डन्डीबियो खेल्न च्यालेन्ज गरेपछि उनी डन्डीबियो प्रतियोगितामा मैदानमा उत्रन्छन् । प्रतियोगिताकालागि आफ्नो समुहलाई बलियो बनाउन उनी यो चलचित्रमा प्रशिक्षकको भूमिकामा छन् । चलचित्रमा डन्डीबियोका मुख्य खेलाडीमा खगेन्द्र लामिछाने, बुद्दी तामाङ, मेनुका प्रधान, अंकित खड्का, लक्ष्मी बर्देवालगायत छन् ।
चलचित्र अभिनय प्रशिक्षक र डन्डीवियो प्रशिक्षकको भूमिका अन्तरबारे व्युटी न्युज नेपालको जिज्ञासामा अभिनेता अनुप बरालले भने,‘अभिनय सिकाउनु र डन्डीबियो सिकाउन उस्तै जस्तो देखिने भए पनि अभिनयको तुलनामा डन्डीबियो सिकाउन गाह्रो लाग्यो । तथापि बाल्यकालदेखि पोखरामा डन्डीबियो खेलेको र चलचित्रको छायाँकन अघि डन्डीबियो र यसको नियम करिब एक महिना सिकेकोले प्रशिक्षकको भूमिका राम्रैसंग निभाएको छु ।’
छेतेन गुरुङले निर्देशन गरेको चलचित्र डमरुको डन्डीबियोलाई बिनोद गुरुङले निर्माण गरेका हुन् । एक करोड ५० लाख भन्दा बढी बढेको यो चलचित्र खेल जनरामा तयार भएको छ । निर्माण पक्षका अनुसार यो चलचित्र मुलुकका करिब ६ दर्जन सिनेमा हलबाट शुक्रबारदेखि प्रदर्शन हुँदैछ ।
