एनएफडिसी राष्ट्रिय पुरस्कारमा शत्रु गते सर्वोत्कृष्ट चलचित्र
व्युटी न्युज नेपाल व्युरो,
काठमाडौं, १३ बैशाख
बैशाखको मुसलधारे पानीले स्टेजनै बिथोलिए पनि ‘छैटौं एनएफडिसी राष्ट्रिय चलचित्र पुरस्कार २०७४’ सम्पन्न भएको छ । बिहिबार साँझ काठमाडौंको सुविधासम्पन्न पाँच तारे होटल हायातको प्राँगनमा आयोजना गरिएको अवार्ड समारोहलाई वर्षाकै कारण सुरुमा स्थगित गरिएको थियो ।
निरन्त वर्षले स्टेज बिग्रनुका साथै एलईडी लाईट ब्याक ड्रप समेत सर्ट भएर निभ्दा पनि आयोजक पक्षले अवार्ड सम्पन्न गरेरै छाडेको छ । निकै धुमधामका साथ सुरु भएको पुरस्कार समारोहलाई वर्षाले पूर्ण बाधा पारेपछि अन्तत रक्स बारको लबीमा सामान्य रुपमा पुरस्कार प्रदान सहित सम्पन्न गरिएको छ ।
समारोहमा पुरस्कार तर्फ मह सञ्चारद्धारा निर्मित चलचित्र ‘शत्रु गते’ पाँच विधामा आवार्ड चुम्दै सर्वोत्कृष्ट फिल्म बन्न सफल भएको छ । यो चलचित्र अहिले छैटौं हप्तामा प्रदर्शन भईरहेको छ । यस पटकको ‘हिरा सर्वोत्कृष्ट चलचित्र, राष्ट्रिय चलचित्र पुरस्कार’ चलचित्र शत्रु गतेले जितेको हो ।
नेपाल चलचित्र विकाश कम्पनीद्धारा आयोजित एनएफडिसी राष्ट्रिय चलचित्र पुरस्कार समारोहमा विभिन्न २० विधामा प्रतिस्पर्धा भएको थियो । जस अन्तर्गत ‘प्रकाश सर्वोत्कृष्ट, निर्देशक राष्ट्रिय चलचित्र पुरस्कार’ चलचित्र लिली बिलीबाट निर्देशक मिलन चाम्सले प्राप्त गरे । निर्देशक सहित लिली बिलीले विभिन्न चार विधामा पुरस्कार जित्यो । लिली बिली यतीबेला तेस्रो सातामा प्रदर्शन भईरहेको छ ।
यस्तै, अभिनेतातर्फ ‘शिव सर्वोत्कृष्ट अभिनेता, राष्ट्रिय चलचित्र पुरस्कार’ चलचित्र ‘कृ’बाट अनमोल केसीले प्राप्त गरे । अभिनेत्रीतर्फ ‘भुवन सर्वोत्कृष्ट अभिनेत्री, राष्ट्रिय चलचित्र पुरस्कार’ चलचित्र ‘ब्लाइन्ड रक्स’ अभिनेत्री बेनिशा हमालले चुमिन् ।
अभिनेत्री बेनिशा हमाल पुरस्कार लिँदै, तस्बिर सौजन्य ः मेरो फिल्म
‘विश्व सर्वोत्कृष्ट नव अभिनेता, राष्ट्रिय चलचित्र पुरस्कार’ चलचित्र ग्याङस्टार ब्लुजबाट आशिरमान देशराज जोशीले, ‘चैत्य सर्वोेत्कृष्ट नव अभिनेत्री, राष्ट्रिय चलचित्र पुरस्कार’ चलचित्र लिली बिलीबाट जसिता गुरुङले जिते ।
यस्तै ‘गोपालराज, सर्वोत्कृष्ट हास्य कलाकार, राष्ट्रिय चलचित्र पुरस्कार’ चलचित्र छक्का पञ्जा–२ बाट केदार घिमिरेले हासिल गरे । ‘नीर सर्वोत्कृष्ट सहअभिनेत्री, राष्ट्रिय चलचित्र पुरस्कार’ चलचित्र ऐश्वर्यबाट प्रशान्त ताम्राकारले, ‘वसुन्धरा सर्वोत्कृष्ट सहअभिनेत्री, राष्ट्रिय चलचित्र पुरस्कार’ ऐश्वर्यबाटै केकी अधिकारीले प्राप्त गरिन् ।
संगीततर्फको प्रतिस्पर्धामा ‘शम्भुजित सर्वोत्कृष्ट संगीतकार, राष्ट्रिय चलचित्र पुरस्कार’ चलचित्र २ रुपैयाँको कुटुमा कुटु…गीतबाट राजनराज शिवाकोटीले, ‘उदित सर्वोत्कृष्ट पाश्र्व गायन, राष्ट्रिय चलचित्र पुरस्कार’ चलचित्र ऐश्वर्यको तिमी रोएको पल…बाट अन्जु पन्तले हासिल गरिन् । ‘किरण सर्वोत्कृष्ट गीतकार, राष्ट्रिय चलचित्र पुरस्कार’ चलचित्र ए मेरो हजुर–२ को गीत कसम हो कसम…बाट डा. कृष्णहरि बरालले चुमे ।
‘वसन्त सर्वोत्कृष्ट नृत्य निर्देशक राष्ट्रिय चलचित्र पुरस्कार’ चलचित्र २ रुपैयाँको कुटुमा कुटु…गीतको नृत्य निर्देशनबाट कविराज गहतराजले, ‘भुटानी सर्वोत्कृष्ट द्वन्द्व निर्देशन राष्ट्रिय चलचित्र पुरस्कार’ चलचित्र कृबाट चन्द्र पन्तले प्राप्त गरे ।
यस्तै, ‘शुभ सर्वोत्कृष्ट पाश्र्व संगीत, राष्ट्रिय चलचित्र पुरस्कार’ चलचित्र लिली बिलीबाट एलिस कार्की र ‘प्रदीप सर्वोत्कृष्ट ध्वनि पुनः मुद्रण (मिक्सिङ) राष्ट्रिय चलचित्र पुरस्कार’ चलचित्र शत्रु गतेबाट अमित श्रेष्ठले जिते ।
पाश्र्व संगीतको पुरस्कार लिँदै एलिस कार्की
‘चेतन सर्वोत्कृष्ट पटकथा लेखक राष्ट्रिय चलचित्र पुरस्कार’ चलचित्र शुत्र गतेबाट दीपकराज गिरी र प्रदीप भट्टराईले, ‘लक्ष्मी सर्वोत्कृष्ट कथा र संवाद राष्ट्रिय चलचित्र पुरस्कार’ शत्रु गतेबाटै हरिवंश आचार्य र प्रदीप भट्टराईले, ‘तुलसी सर्वोत्कृष्ट सम्पादक, राष्ट्रिय चलचित्र पुरस्कार’ शत्रु गतेबाट मित्रदेव गुरुङले हासिल गरे ।
यो वर्षको ‘मह जुरी राष्टिय चलचित्र पुरस्कार चलचित्र भुईं मान्छेबाट अभिनेता रमेश बुढाथोकीले र ‘कुसुमे रुमाल सर्वोत्कृष्ट व्यावसायिक चलचित्र पुरस्कार’ चलचित्र छक्का पञ्जा–२ ले हाँसिल ग¥यो ।
बरिष्ट पत्रकार पुष्कारलाल श्रेष्ठबाट पत्रकारिता पुरस्कार ग्रहण गर्दै पत्रकार फुलमान बल
‘पुष्कर चलचित्र पत्रकारिता, राष्ट्रिय चलचित्र पुरस्कार’बाट पत्रकार फुलमान बललाई पुरस्कृत गरियो । उनी कान्तिपुर दैनिकका बरिष्ट उप सम्पादक हुन् ।
