काठमाडौं, १३ चैत
शुक्रबारबाट देशव्यापी प्रदर्शनमा आएको चलचित्र शत्रु गते हेरेर नेकपा एमालेका पुर्व अध्यक्ष तथा पूर्व प्रधानमन्त्री झलनाथ खनाल, एमाले उपाध्यक्ष भिम रावल सहितका नेताले मनोरञ्जन लिएका छन् ।
राजधानीको बागबजारमा रहेको सिटी म्याक्स सिनेमा हलमा पूर्व प्रधानमन्त्री खनाल, उपाध्यक्ष रावल, देबेन्द्र पौडेल, ठाकुर गैरे, साँसद जीवनराम श्रेष्ठ लगायतले यो फिल्म हेरेका हुन् ।
फिल्म हेरेपछि पूर्व प्रधानमन्त्री खनालले शत्रु गते निकै रमाइलो बनेको र हाँसोले भरिएको बताए । निकै आधुनिक चलचित्र बनेको शत्रु गतेको चर्चा सुनेर आफु हेर्न आएको खनालले बताए । फिल्म मन परेकैले सम्पूर्ण समय बसेर फिल्म हेरेको प्रतिक्रिया दिँदै शत्रु गतेले मनोरंजनसंगै संदेश पनि दिएको उनले जिकिर गरे ।
उपाध्यक्ष भिम रावलले फिल्म रमाइलो बनेको बताउँदै मदनकृष्ण श्रेष्ठ र हरिबँ आचार्यको काम तारिफ योग्य भएको प्रतिक्रिया दिए । यो चलचित्रका कलाकारहरु हरिवंश आचार्य, किरण केसी, दीपक राज गिरी, दीपाश्री निरौला र प्रदीप भट्टराई लगायत पनि सो हलमा नेताहरुलाई भेट्न पुगेका थिए ।
यो चलचित्रलाई प्रदीप भट्टराईले निर्देशन गरेका हुन् । यसका निर्माता किरण केसीले शत्रु गतेले प्रदर्शनीको तेस्रो दिन आईतबारसम्म नै ३ करोड २७ लाख बराबरको व्यापार गरिसकेको बताए । दर्शकले सिनेमालाई धेरै रुचाएको उनको कथन छ ।
यसमा दीपकराज गिरी, दीपाश्री निरौला, नरेन्द्र कंसाकार, शिवहरी पौडेल, यसोधा श्रेष्ठ र रमिला आचार्य निर्माता रहेका छन् ।
