ब्युटी न्युज नेपाल
काठमाडौँ, १५ असार
अग्रज लोक तथा दोहोरी गायक, कलाकार, पत्रकार रामप्रसाद खनालले नयाँ कृष्ण भजन ‘के लिएर आएका थ्यौ सोंच त’को भिडियो सार्वजनिक गरेका छन् । जीवनको अस्थायीपन, मानव जन्मको सार्थकता, कर्म, भक्ति र भगवान श्रीकृष्णप्रतिको समर्पणलाई केन्द्रमा राखेर तयार गरिएको यो भजन संसारभर एकसाथ डिजिटल माध्यमबाट सार्वजनिक गरिएको हो।
भजनको बोल, संगीत तथा संगीत संयोजन स्वयं रामप्रसाद खनालकै रहेको छ। गीतको गायन पनि उनले नै गरेका हुन्। संगीत संयोजनलाई थप आकर्षक बनाउन अनुभवी संगीतकर्मी कुमार थापा मगरले मिक्सिङ तथा स्टुडियो व्यवस्थापनको जिम्मेवारी सम्हालेका छन् भने रेकर्डिस्टका रूपमा सुमन थापाको योगदान रहेको छ।
संयुक्त राज्य अमेरिकामा बसोबास गर्दै नेपाली भाषा, संगीत, साहित्य र संस्कृतिको संरक्षण तथा प्रवद्र्धनमा निरन्तर सक्रिय खनालले पछिल्ला केही वर्षयता आध्यात्मिक, सामाजिक र सांस्कृतिक चेतनासम्बन्धी गीत–भजनहरू निरन्तर सार्वजनिक गर्दै आएका छन्। यसै शृंखलाको पछिल्लो कडीका रूपमा आएको ‘के लिएर आएका थ्यौ सोंच त’ ले मानव जीवनको वास्तविक उद्देश्यबारे गम्भीर प्रश्न उठाउँदै भगवान श्रीकृष्णको शरणमा जान प्रेरित गर्ने सन्देश बोकेको छ।
भजन सार्वजनिक गर्दै खनालले हिन्दु धर्म, संस्कार र आध्यात्मिक मूल्यहरूको संरक्षणका लागि यस्ता सिर्जनाले समाजमा सकारात्मक प्रभाव पार्ने विश्वास व्यक्त गरेका छन्। उनले अहिलेको समय धार्मिक तथा सांस्कृतिक चेतनालाई मजबुत बनाउने आवश्यकता रहेको उल्लेख गर्दै यो भजनलाई सकेसम्म धेरै श्रद्धालु र संगीतप्रेमीमाझ पु¥याउन आग्रह गरेका छन्।
उनका अनुसार यो भजन नाफामूलक वा व्यावसायिक उद्देश्यका लागि निर्माण गरिएको होइन। भगवान श्रीकृष्णको भक्ति, धार्मिक चेतना र सनातन संस्कृतिको प्रचार–प्रसारलाई मुख्य उद्देश्य बनाएर निर्माण गरिएको यस भजनलाई विश्वभरका नेपाली समुदायसमक्ष एकैसाथ सार्वजनिक गरिएको हो।
भजनको भिडियो पक्ष पनि निकै आकर्षक ढंगले तयार गरिएको छ। काठमाडौंस्थित सारङ्गी संसार र मयुर स्टुडियोमा छायांकन गरिएको भिडियोको निर्देशन स्वयं रामप्रसाद खनालले गरेका हुन्। छायांकन ताराकान्त बीके र प्रदीप बोहोराले गरेका छन् भने सम्पादन पनि ताराकान्त बीकेले गरेका छन्।
म्युजिक भिडियोमा रामप्रसाद खनालसँगै तीर्थ पौडेल, कमल बीके, प्रतिमा बीके, प्रमेश घिमिरे, रमिला रसाइली, कल्पना बीके, चन्द्र थापा किरण, संगीता हर्मेल, खगेन्द्र बुढा मगर, लवकुश महत लगायतका कलाकारहरूको अभिनय रहेको छ। भिडियोमा कृष्णभक्ति, सांस्कृतिक वातावरण तथा नेपालीपनलाई जीवन्त ढंगले प्रस्तुत गर्ने प्रयास गरिएको निर्माण पक्षले जनाएको छ।
भजन निर्माणका क्रममा चलचित्र निर्देशक नारायण रायमाझी, तीर्थ पौडेल, ऋषिराम खनाल, इन्जिनियर ज्ञानेन्द्र खनाल, डा. सुष्मा खनाल, डा. सुदर्शन गौतम, सारङ्गी संसार तथा मयुर स्टुडियोलगायतले विशेष सहयोग गरेको जनाइएको छ। सम्पूर्ण निर्माण कार्य इण्टरनेशनल मिडिया एण्ड इन्टरटेन्मेन्ट हाउस यूएस एलएलसीले गरेको हो।
भजनको विशेषता यसको मौलिक लोकलय पनि हो। रामप्रसाद खनालका अनुसार यस भजनको धुन गुल्मी क्षेत्रमा आफू बाल्यकालदेखि सुन्दै आएको परम्परागत लोकलयमा आधारित छ। उक्त लोकधुनलाई आधुनिक शैलीमा केही परिमार्जन गरी प्रस्तुत गरिएको हो। भजनको पहिलो भागका शब्दहरू उनको आफ्नै सिर्जना हुन् भने पछिल्लो भागमा प्रचलित तथा संकलित भजनका शब्दहरू समावेश गरिएको उनले स्पष्ट पारेका छन्।
साथै, खनालले टेलिभिजन, रेडियो, मठ–मन्दिर तथा धार्मिक संस्थाहरूलाई यो भजन डाउनलोड गरी निःशुल्क प्रसारण गर्न अनुमति दिएका छन्। तर अन्य कुनै व्यक्ति वा संस्थाले भिडियो डाउनलोड गरी पुनः अपलोड गर्न नपाइने स्पष्ट चेतावनी दिइएको छ। दर्शक तथा श्रोताहरूलाई आधिकारिक युट्युब च्यानलमार्फत मात्रै भजन हेर्न र शेयर गर्न आग्रह गरिएको छ।
