ब्युटी न्युज नेपाल
काठमाडौँ, २० चैत
कास्टको हिसाबले यो वर्षको सर्वधिक शक्तिमान मानिएको चलचित्र पिताम्बर यही आउँदो नयाँवर्ष २०८२ को छेको पारेर २९ चैत २९मा रिलिज हुँदैछ । रिलिजको मिति नजिकिँदै गर्दा चलचित्र पिताम्बरको एक्सनप्रधन ट्रेलर मंगलबार काठमाडौँमा एक समारोहबीच सार्वजनिक गरिएको छ । ट्रेलरलाई सार्वजनिक समारोहमा प्रदर्शनपछि बुढासुब्बा डिजिटलको युट्युव च्यानलबाट रिलिज गरिएको छ ।
यो चलचित्रको ट्रेलरमा एक्सनसँगै मानवीय समवेदना र अन्याय तथा अत्याचारका दृश्यहरु प्रस्तुत गरिएको छ । जसमा अभिनेत्री सुरक्षा पन्त र एक बच्चा गहुँबारीमा रमाईरहेको दृश्यबाट सुरु भएको ट्रेलरमा पिताम्बरका शिर्ष कलाकारलाई स्थान दिइएको छ ।
ट्रेलर रिलिज पछि फिल्मकी निर्देशक कृषा चौलागाईले ट्रेलर रिलिज गरेसँगै यो चलचित्र दर्शकलाई सर्मपण गरेको बताइन् । ‘ट्रेलर आएसँगै हामीले दर्शकलाई समर्पण गरिसक्यौं । टिजर, गीत, पोस्टरजस्तै ट्रेलरलाई पनि मनपराइदिनुहुनेछ भन्नेमा ढुक्क छौं’, उनले भनिन् ।
फिल्मका निर्माता विशाल चौलागाईले आफूले नेपाली फिल्म क्षेत्रलाई एउटा राम्रो फिल्म दिएको बताए । उनले फिल्मकर्मी मिलेर जान सकेमा फिल्म उद्योगको भलाई हुने बताए ।
केपी फिल्मस् र पुरुषोत्तम प्रधान फिल्मसको व्यानरमा निर्माण भएको फिल्ममा प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ल, रविन्द्र झा, प्रमोद अग्रहरि, आर्यन सिग्देल, कामेश्वर चौरासिया, टिका पहाडी, सुलभ पहाडी, सुरवीर पण्डित, विशाल पहाडी, दिव्यदेव पन्त, सुपुष्पा भट्ट, दिव्या रायमाझी, गौरव विष्ट, आशिष पुरुष, ललित विष्ट, किशोर भट्ट, विनोदकुमार पौडेल, नारायण काफ्ले र रविन्द्र भट्टराईको अभिनय छ ।
फिल्ममा बाल कलाकारका रुपमा आर्नव घिमिरे, प्रयुस दत्त सुवेदी, आध्य लामिछाने, आरोह चौलागाईं र सुप्रोल बुढाथोकी (अनमोल)ले समेत अभिनय गरेका छन् ।
विशाल चौलागाईं निर्माता रहेको फिल्ममा पुरुषोत्तम प्रधान, आध्य लामिछाने र आरोह चौलागाईं सह–निर्माता, सुमन गौतम कार्यकारी निर्माता, प्रदीप भारद्वाज र अभिमन्यु निरवीको पटकथा र संवाद, पुरुषोत्तम प्रधानको डीओपी, शेरबहादुर लामा र मानकृष्ण महर्जनको छायांकन रहेको छ । यो चलचित्रलाई आर आर फिल्मस्ले वितरण गर्दैछ ।
